Problematica di 'Carnaval Babies' ta bolbe lanta cabes
*Abuso di alcohol y hasta promiscuidad ta hungando un rol
ORANJESTAD (AAN): Ta conoci cu p'e temporada di carnaval ta activa e situacion asina yama 'carnaval babies', cual ta un situacion resultado di e epoca aki unda hopi hoben ta expone nan mes na sex sin proteccion cu resultadonan no desea.
Monique Giel, Tienermoederconsulent di Wit Gele Kruis a splica cu den october/november ta wak cu tin varios mucha muher cu ta haya yiu. El a bisa cu algun aña pasa, na 2020, a yega di registra 9 mucha muher menor di edad cu a sali na estado y a haya yiu den e periodo ey. Esaki a bolbe ripiti na 2021. Na 2022, no tabata mescos pasobra no tabata tin carnaval.
El a agrega cu e aña aki cu tin carnaval ta bay wak e problematica aki atrobe. Si por bisa cu ya caba pa e prome a tuma nota cu tabata tin hopi uzo di alcohol y cu ora cu e hobennan aki tabata crioyamente bisa 'bon burachi', nan a bay tene relacion sexual, no c'un partner, pero cu diferente partner.
"Corda bon cu ora bo ta bao di influencia di alcohol bo no sa kico bo ta haci, (...) bo ta tof, e ora ey bo tin e power, e smaak y anto eseynan ta e comportacionnan di nos hobennan anto e ora ey bo ta haya e consecuencianan cu ne", Giel a splica.
El a sigui bisa cu e lema di WGK ta keda 'Preveni ta mas miho cu cura'. Pesey ta miho preveni pa despues no tin cu atende cu e consecuencianan.
Segun Giel, nan ta sigui duna charla na scolnan, perp awor kier pone enfasis riba e scolnan basico pasobra a ripara cu atrobe e edad pa e actonan sexual ta bahando. E problemanan social tin su consecuencianan cu e muchanan ta trece cu ne cu e muchanan ta cuminsa cu e relacionnan sexual mas tempran y hasta cu diferente pareha.
E hobennan no ta hayando atencion na cas y nan ta bay busk'e pafo cerca e hendenan robes. Pesey WGK ta pone enfasis riba e scolnan basico, 5de cu 6de klas, y nan ta bezig tambe cu educacion sexual cu a bin c'un extra trayecto pa e scolnan di SKOA y eerste cu 2de klas. 3de cu 4de tambe nan ta haci'e, pero hopi biaha e muchanan ya caba ta activo of nan ta bezig of den cierto situacionnan y e charlanan aki no ta interesante pa nan, a señala.
Loke ta brinda nan ta consulta, principalmente riba e parti di kehonan of preguntanan pa loke ta algun sintoma of situacion cu nan ta ripara cu nan curpa. Hopi biaha e muchanan aki ta haya miedo di puntra, pero esaki tin su consecuencianan cu ne, pasobra si nan no ta haya tratamento, den caso di un malesa, esaki por bira pio, Giel a indica.
