Wardacosta a rescata dos naufrago venezolano riba lama grandi

ORANJESTAD (AAN): Tabata Dialuna atardi cu Centro di Operacion Maritimo (MOC) di Wardacosta di Caribe Hulandes a ricibi un notificacion cu un barco tankero a mira un naufrago riba lama grandi.

   E personal atento riba e tankero a tuma nota cu tin hende den problema ta drief nan so riba algun obheto, pa asina nan no sink y hoga.

   Mesora e Centro MOC di Wardacosta a traspasa e coordinadonan pa e Helicopter di Wardacosta.  Esaki a lanta vuelo y a dirigi su mes na e posicion riba lama pa rescata e personanan aki.

   Danki na e precision di e yamada di rescate, e personal di Helicopter a bin haya dos persona masculino ta drief riba algo cu ta parce di ta nan boto cu a bolter riba lama.

   Cu e hoist instala na e Helicopter, e personal bon entrena di Wardacosta a baha bay te abao na awa, pa asina mara e tripulantenan bon, y asina a subi bek bay halto cu nan.  A bin nota cu e dos naufrago aki ta venezolano, nan curpa ta hopi debil y basta deshidrata.  A suministra nan oxigeno y a dicidi na bay busca yudanza medico lo mas rapido posible pa nan.

   Despues di a saca e dos hombernan for di awa, e Helicopter a cuminza bay rumbo pa Aeropuerto di Aruba.  Aki a manda busca Ambulans pa ricibi nan.  Mesora Paramediconan a pasa nan over y a bay cu nan pa Hospital.