Wardacosta a confisca 630 kilo di cocaina pero e boto cu traficantenan a logra huy

ORANJESTAD (AAN): E barco di Marina Hulandes, esta Zr.Ms. Holland cu aworaki ta nabegando pa Wardacosta di Caribe Hulandes,

riba Diabierna anochi cu a pasa a trata di intercepta un transporte di droga cu tabata socede e momento ey riba un speedboat tipo Go-Fast.

   Pero e Go-Fast na final a logra di huy toch, sinembargo durante cu e ta huy, nan a dicidi na zwaai y benta varios bulto di droga riba lama.  Esaki ta loke ta wordo yama un ‘disrupt’.

   Wardacosta a confirma cu ta e avion di patruyahe di Wardacosta di Caribe Hulandes a detecta e boto aki cu droga den dje.  Mesora a notifica Centro Operacional Maritimo di Wardacosta, cu a core manda e mensahe pa e barco Zr.Ms. Holland.  Nan a baha mesora un boto di intercepcion tipo FRISC, cu a sali velocidad halto rumbo pa e area.

   Abordo di e boto di FRISC, tabatin un team combina di oficialnan, cu ta autoriza pa detene hende y mas, incluyendo tripulante di e barco y e Fleet Marine Squadron.  Nan a persigui e Go-Fast.

   Durante e persecusion, nan a mira claramente con e delincuentenan tabata zwaai y benta bulto di droga riba lama.

   Na final di e persecusion y e ‘disrupt’ aki, e personal di FRISC a pasa recoge tur bulto for di lama.  E pakinan di droga aki a wordo entrega despues na Wardacosta, cu na su turno a pasa nan pa Cuerpo Policial di Curaçao.  Eynan so un total di 630 kilo di cocaina a wordo saca for di lama.

   E barco Zr.Ms. Holland desde October 2022 ta fungi como stationsschip pa Caribe y ta activo den region, y ta duna un man tambe den combatimento di narcotrafico yudando Wardacosta di Caribe Hulandes.