Vicky Arens a presenta na e simposio REPAIR na Hulana

ORANJESTAD (AAN): Directora di Cas di Cultura, señora Vicky Arens, a presenta e trabao di Cas di Cultura en conexion cu

e tema di nos herencia colonial y a presenta un futuro proyecto cu lo yuda crea mas concientisacion riba Aruba su pasado colonial y e rol di Cas di Cultura den forma nos propio identidad.

   Dia 23 di september e proyecto “REPAIR: Siña Husticia Cultural for di Islanan ABC” a yega su culminacion, despues di un aña di dialogo y preparacion cu partnernan di Aruba, Bonaire, Corsou y Hulanda. E proyecto a wordo dirigi pa academiconan di Universidad di Utrecht, Señora Camila Malig y Señora Jamila Mascat, cual a duna espacio pa papia tocante e impacto duradero di herencia colonial riba herencia cultural actual.

   A explora con intervencionnan reparativo desaroya na e Islanan ABC, cu formatonan diferente, por informa y forma un ehempel den debatenan mas amplio riba practicanan di herencia, husticia cultural y reparacion. Partnernan den e proyecto tabata Vicky Arens pa Cas di Cultura Aruba, Emma Louise Prat pa Fundashon Historiko Kultural Boneriano, Zhwendeline Pieter di Association of Museums & Heritage of Curaçao y Leenke Ripmeester di Eye Filmmuseum di Hulanda.

   Cu un reunion interactivo bibo y online, interesadonan y representantenan di various gremio cultural, social-cultural y educativo, a dialoga tocante kico ta e necesidadnan, den e sentido di organizacion of den un systema di comunicacion, pa crea un futuro cu mas comprencion y igualdad como ciudadanonan den Reino. Esaki a tuma lugar na e Eye Collection Center di e museo di cine Eye na Amsterdam.

   E dia prome, na Pakhuis de Zwijger, publico interesa y profesionalnan a scucha presentacionnan tocante ehempelnan di husticia cultural door di e partnernar di proyecto. Tambe tabata tin un foro pa discucion y dialogo y a mustra cinenan procedente di islanan ABC, incluyendo e documentario Memoria Ancestral, traha pa Natusha Croes cu un gran ekipo di participante, den nomber di Cas di Cultura.

   Señora Arens a culmina su presentacion cu e proyecto cu a nace di Memoria Ancestral, cual ta un exhibicion permanente cu lo wordo traha conhunto cu e renobacion di Cas di Cultura. E exhibicion lo trata e besindario di Mon Plaisir, e establecemento di “Het Cultureel Centrum” na 1958, y e decadanan despues cu e instituto y actornan den e veld cultural a traha caminda pa Cas di Cultura haya su identidad Arubiano. E exhibicion aki lo forma un punto mas riba e mapa di e historia di nos pais.