ORANJESTAD (AAN) – Laura Tromp, Verpleegkundige di Ambulans, den conferencia di prensa na ImSan,
tambe a splica tocante e investigacion cu Departamento di Ambulans ta bay haci bao su clientenan, den cuadro di mehoracion di nan servicio.
Laura Tromp a duna di conoce cu un par di luna pasa nan a cuminza “brainstorm” tocante ki sorto di cualidadnan nan kier cuminza desaroya na ambulans y nan a bin haya e investigacion aki, cu na Hulanda ta wordo haci pa ley, cada tres aña, na tur departamento di ambulans.
Nan a tuma contacto cu e team di onderzoek cu ta haci e lista di preguntanan y nan a duna ok pa nan por uza e lista aki. Tromp a comenta cu, conhuntamente cu su colega Angelo, a adapta e lista na e cuido cu nan ta brinda na Aruba, y nan a traduci e preguntanan na Hulandes, Ingles, Spaño y Papiamento, mirando cu Aruba ta un isla unda ta papia diferente idioma, y asina nan tur por yena e lista.
“Nos ta pidi cooperacion di tur pashent cu ta haya cuido pa yena e lista di preguntanan aki”, Laura Tromp a reitera.
