Pidiendo claridad y transparencia caso Arubahuis:
ORANJESTAD (AAN)—Di parti di fraccion di MAS a sali un carta di su lider, Parlamentario Marisol Tromp, y su colega Parlamentario Aquannette Gunn, dirigi na Prome Minister Evelyn Wever-Croes.
Den conferencia di prensa, Tromp a splica cu den e carta aki su persona y Gunn ta pidi Prome Minister, pa duna claridad y transparencia tocante e caso di Arubahuis.
Tromp a expresa cu na Parlamento mes, e dignatario a bisa den diferente ocasion, cu lo tin un investigacion andando via CAD (Central Accountings Dienst) pa Arubahuis.
“Despues, nos a bin tende tambe cu lo tin un investigacion cu ta wordo haci door di Recurso Humano. Loke nos a pidie, recientemente, ta pa manda Parlamento di Aruba, un copia di e CAD Rapport, caminda cu nan lo a investiga supuesto- posible iregularidadnan na Arubahuis, unda cu nos a pidi den cuadro di integridad y transparencia, pa manda nos e relato aki. Nos tin tur e derecho pa ricibi’e y wak kico a sosode pasobra ta trata di placa di pueblo”, Marisol Tromp a expresa.
E parlamentario a agrega cu pidiendo esey, nan ta mira cu Minister Presidente a bisa algo straño: el a bisa cu e rapport no ta cla, di un investigacion cu a cuminza basta tempo pasa. “Pero den mes rosea, e ta bisa tambe ‘nos ta trahando riba e sugerencianan cu DHA a duna nos y CAD a duna nos’. Esaki ta sona contradictorio; esey kiermen cu e rapport ta cla pa bo por tin e conseho y sugerencianan kiermen cu bo a lesa e rapport aki”, Marisol Tromp a remarca.
El a subraya cu, den ki forma cu ta, si e rapport ta cla Parlamento tin tur derecho di pidie, y e como Minister tin e deber di entregue na Parlamento.
“Bin un reunion akiden, splica nos su contenido den reunion, y manda e rapport pa nos pasobra no por ta un secreto ora cu un investigacion di CAD wordo haci, unda cu nan ora cu un rapport di e indole aki ta wordo haci, ora cu e sali afo semper nan ta pone sugerencianan a drecha e situacion”, Marisol Tromp a señala. Tromp a conclui, bisando cu si e minister concerni a retira, esey no ta haci efecto, pasobra Parlamento por pidi cualkier documento na cualkier momento.
