PORT OF SPAIN: Dos Venezolano a wordo deteni door di Polis di Trinidad & Tobago, despues di un tiroteo registra ora cu un cutter di Coast Guard
di e pais a trata di intercepta un speedboat cu a yega cerca procedente di Venezuela, cu varios persona abordo.
Coast Guard di Trinidad & Tobago a divulga den fin di siman via un boletin, cu e caso a socede dilanti costa di Cedros, na e parti zuidwest di e isla di Trinidad.
Un cutter di nan a intercepta un speedboat Venezolano cu tabata yegando cerca di e isla, y ora cu nan a duna nan ordo pa stop di nabega, e hendenan abordo a cuminza los tiro riba nan.
Durante e intercambio di tiro, e speedboat Venezolano a haci un maniobra bruto cu a pone cu dos homber a sali cay den lama. E dos hombernan aki a wordo gara door di Coast Guard, pero e otro ocupantenan a huy hunto cu e speedboat cu a tuma rumbo bek pa Venezuela.
E dos hombernan a wordo hiba tera y ta cera pa un serie di interogacion.
Na comienzo di siman pasa, Polis na Trinidad & Tobago a detene un grupo di 34 Venezolano ora nan a wordo descubri acompaña pa un guia local na beach na Mayaro, cu ta keda na costa pariba di Trinidad. E ilegalnan a trata di sconde den un structura bandona ey cera ora nan a wordo sorprendi, pero na final tur a wordo deteni y poni den cuarentena. E Venezolanonan a subi tera cu varios haula cu parha den nan, posiblemente di contrabando pa hende cu a pidi nan.
Ultimo lunanan, Venezolano ta cruzando lama masalmente pa yega Trinidad & Tobago, y tur esaki debi na e instabilidad politico y social na nan pais. Na luna di Juli mes, gobierno di e isla aki repatria mas di 650 Venezolano bek pa nan pais.
