ORANJESTAD (AAN): Mescos cu tur aña, Partido MEP e aña aki tambe ta brinda ayudo cu yenamento di formulario di impuesto di entrada 2020.
Debi na Covid e procedura e aña aki tambe lo ta diferente, al estilo ‘drive thru’.
Lider di MEP, Sra. Evelyn Wever-Croes ta invita tur ciudadano cu tin mester e yudansa pa yena nan formulario di impuesto, pa pasa libremente riba e fechanan cu lo brinda e servicio aki na Cede di MEP na Sta. Cruz.
FECHA PA YENA FORMULARIO NA CEDE DI MEP:
Dianan diamars 21, diahuebs 23, diasabra 25, diamars 28, diahuebs 30 september y diasabra 2 october. Diamars y diahuebs, parti mainta 9:00 am pa 12:00 pm y parti atardi 6:00-9:00 pm.
Diasabra 9:00 am pa 1:00 pm.
HACI CITA:
Mescos cu aña pasa, biaha aki tambe e proceso lo bay solamente cu cita. Por haci un cita na number 5941977 y dia di e cita e persona ta entrega e formulario estilo “drive tru” y den minimo 20 minuut e formulario ta yena y duna bek den man di e persona.
E formularionan no ta keda atras na Cede di MEP, pasobra ta trata di informacion confidencial, y no por core riesgo cu nan ta perde. Durante e cita e persona ta warda den su auto y despues e por sigui haci su diligencianan.
Debi na e procedura aki, no por atende mes hopi hende pareu, pero lo haci tur lo posibel pa atende tur hende.
DOCUMENTONAN:
Pa por yena e formulario ta importante pa bo tin comprobante di entrada anual, sea di trabou of di pensioen, tambe di SVb. Y si bo tin debe cu bo ta paga interes, mester di comprobante di e interes paga den 2020. Finalmente si tin yiunan ta studia den exterior, mester inclui comprobante di inscripcion di e yiu na e scol den exterior.
CONTACTO CU SOSTENEDORNAN DI MEP:
“Pa Partido MEP, ta primordial pa sigui den contact cu nos sostenedornan. Y specialmente e temporada di impuesto ta un temporada importante pa nos partido y pa nos sostenedornan. E aña aki atrobe lamentablemente nos mester tene poco distancia, pues no por duna otro man ni brasa manera nos ta custumbra, pero ta pa nos propio bienestar y di henter pueblo di Aruba. Mi kier un biaha mas recorda cada ciudadano, paga impuesto ta deber di nos tur, pero no paga di mas impuesto. Yena bo formulario y entreg’e na tempo”, Lider di MEP, Evelyn Wever-Croes a expresa.
{gallery}Partido MEP pa yena formulario di impuesto 2020{/gallery}
