ORANJESTAD (AAN): Pa motibo di e tormenta invernal Kenan cu ta afectando diferente parti di Merca e weekend aki, varios vuelo cu tabata tin como destino Aruba of cu mester a sali for di Aruba a wordo cancela.
Mas cu logico, esaki tambe a sosode pa otro paisnan, pero sigur Aruba tambe ta wordo afecta pa e situacion cu e tormenta aki ta trece cu ne.
Na diferente estado, incluyendo Florida, ta espera temperaturanan hopi abao. Na e estadonan mas pariba manera New York ta spera hopi sneu.
Aeropuerto di Aruba a informa tur viahero pa check e status di nan vuelo of contact nan aerolinea relaciona cu retrasonan of cancelacion.
Pa loke ta Aruba, mayoria di vuelo di jetBlue for di Boston y New York a wordo cancela como tambe di United y Delta.
Riba potret por mira e fechanan y e vuelonan corespondiente na 28, 29 y 30 di Januari cu a haya confirmacion di cancelacion, segun informacion di Aeropuerto di Aruba.
