Na despedida di Januari 2022 pa mundo speransa ta loke a resta --- *Un mihor 2023 ta depende di comportacion di hende y virus --- *Recuperacion ta exigi mihor salud, miho vacunacion y bon terapia
ORANJESTAD (AAN)- Awe mundo ta cuminsa despedi di Januari, e prome luna di 2022 cu a demostra di ta hopi carga.
Entrada di otro siman lo bira salida di Januari, cu a entrega mundo suficiente material pa atende den e diezun lunanan cu a resta di e aña nobo.
Ora tira un bista riba e luna cu a habri 2022, ta mira cu el a produci suficiente motibo pa tur hende na mundo cuminsa tuma e realidad actual na serio y duna su aporte pa yega na solucionnan.
Mester scrap e milager grandi cu a spera cu 2022 lo a bira y esaki sigur a base di e atake di Omicron cu manera DIARIO a adverti for di final di December 2021, lo conoce un culminacion na Januari.
Omicron tabata motibo pa expertonan financiero mundial adapta tur nan cifranan y pronostico pa 2022, cu mester a bira e aña cu lo a hiba mundo na e normalidad nobo.
Na momento cu Omicron a presenta, e Fondo Monetario Internacional, cu ta yuda paisnan mantene salud di e sector financiero di nan pais den condicion, a adverti pa e resultadonan serio cu e por tin sigur pa paisnan chikito y cu un economia cu ainda ta desaroya.
E siman aki e Fondo Monetario Internacional a confirma e pensamento cu mundo lo conoce menos recuperacion economico cu a wordo spera.
Fondo Monetario Internacional a baha e porcentahe di crecemento economico mundial y a mustra riba e situacionnan preocupante cu ta wordo registra na Merca y na China, cu ta e dos paisnan cu ta para na top di e lista di podernan economico mundial.
E expertonan di IMF no ta duna garantia cu e desaroyonan positivo lo presenta manera nan a proyecta awor y den cual 2023 mester duna comienzo na recuperacion economico.
Tur pronostico di IMF atrobe ta mara na e Coronavirus nobo y na e forma cu Omicron lo sigui desaroya.
Pero hende tin un responsabilidad enorme pa sigura cu mundo por conoce un desaroyo economico faborabel na 2023.
E Fondo Monetario Internacional ta mara un upgrading di economia mundial na 2023 na diferente exigencia y ta papia entre otro di e necesidad pa vacuna alcanza e Miyones y Miyones di habitantenan di paisnan pober.
A wordo indica den e relato den cual IMF ta presenta su pronostico, cu cantidad di pais sin resurco necesario, ta sigui forma un problema serio pa intentonan pa vence e pandemia.
Segun e expertonan di IMF, e cantidad di casonan di problema di salud mester baha. Mehoracion economico ta mara na e condicion di un mihor plan mundial di vacuna, cu ta permiti pa paisnan pober tambe wordo vacuna.
Finalmente ta wordo indica cu mester upgrade terapia pa pashentnan di e malesa.
2022 no ta bira un aña facil. Inflacion lo manda costo di bida halto riba plataforma internacional y lo afecta tur pais.
Prijsnan mas halto lo provoca aumento di otro prijsnan loke lo exigi maneho firma di gobiernonan na tur parti di mundo.
Un cos ta sigur.
E salida di 2021 pa drenta 2022 no a deshaci di tur problema cu tabata tin riba mesa pero a duna nan mas contenido y motibo pa haya atencion.
E forma cu costo di bida lo afecta tur hende, mester wordo bon splica na Pueblo cu mester wordo bon informa riba e peligernan pa nan bienestar financiero causa pa inflacion.
Aumento di prijs lo forma un circulo dificil pa bandona na 2022 mientras paisnan mester dedica atencion na e cantidad di hende cu por traha y no ta wordo stroba di haci nan trabou dor di Omicron.
Un booster nobo adapta na Omicron ta na caminda. Incertidumbre ta sigui existi y ta uno di e puntonan principal cu a haci cu expertonan mundial ta bati alarma grandi pa loke mas incertidumbre por nifica pa un mundo, agota y cansa di e atake di e linea di variantenan di Covid-19.
Cu un guera cu tur atencion, demanda creciente pa gasolin cu ta bira scars, menos perspectiva pa 2022, Januari ta tuma despedida na inicio di e siman nobo, cu lo habri porta pa Frebruari 2022.
