Varios persona ta sugeri pa no laga motorcyclenan revv mas den futuro cu muffler dirigi na publico

Algo cu a pasa Diasabra na Palo Marga

ORANJESTAD (AAN): Ta asina cu bo Matutino DIARIO, cu porcierto ta e unico matutino aki na Aruba, cu ta cubri motorsport, a publica un articulo dialuna, relaciona cu e evento mahestuoso di Real 2 Real cu a tuma lugar riba pista di Palo Marga.  A ricibi hopi bon reaccion pa cu e cobertura ey un biaha mas.

   Sinembargo DIARIO a ricibi sugerencia di un grupo basta grandi, cu a gusta e show, pero ta kere cu loke e MC di Aruba a haci dado momento, por a bay mihor coordina, ya cu publico a nota cu cierto momento cu e brommer nan di Aruba, a sali pa haci show, e animador  a opta pa yama un di brommernan di Aruba  pone para ‘lomba’ pa publico y laga revv e motor bay off, cu consecuencia, cu cierto momento e brommer aki a cuminsa supla partinan cayente di e muffler den publico, causando un panico entre e publico y creando y situacion hopi peligroso pa e bishitantenan.  Sin lubida cu den tribuna tabatin hopi mucha inocente.

    Un di e otro sugerencia cu a haya, ta di algun mayor cu nan yiu ta core Scooter, caminda cu no solamente a cobra e muchanan pa haci show pa publico, pero cu a duna nan 1 biaha so e oportunidad di presenta, mientras cu varios di nan a traha siman largo, pa presenta un bon show y no a haya chens pa haci esaki.

   Atrobe DIARIO a nota, cu esaki ta parti di e reclamonan cu drenta, y no ta algo cu placer ta publica, ya cu e show mes en total tabata tabata great y fenomenal.  Pero toch tin di tene cuenta cu e sugerencianan di publico, y kizas coregi e fayonan aki pa futuro.  Esey lo yuda mehora e calidad di shownan pa futuro, pa asina no tin mas di e reclamonan aki innecesariamente.