Varios dignatario presente na celebracion Dia Nacional na Den Haag

ORANJESTAD (AAN): Manera DIARIO a menciona, Minister Plenipotenciario mr. Ady Thijsen y esposa a tene un recepcion pa celebra Dia di Himno y Bandera na Hulanda.

   Desde 2015 Arubahuis ta tene un recepcion pa invitadonan for di e mundo politico, embahadornan, functionarionan halto di Estado of di ministerionan cu lasonan estrecho cu Aruba. Tambe miembronan prominente for di e comunidad Arubiano na Hulanda y representantenan commercial y di institutonan di enseñansa tanto riba nivel di HBO como Universidad.

   Entre e huespednan tabata burgemeester di Den Haag Jan van Zanen, ex-burgemeester di Venray Leontien Kompier y miembro di Eerste Kamer Tekke Panman. For di e cuerpo diplomatico tabata presente entre otro embahadornan di Alemania, Uruguay, Norwega, Dinamarca y representante di embahada di Cuba, Colombia, Costa Rica, Peru, Chili, Panama y Italia. Potretnan di Michael Groen pa cortesia di Arubahuis.