Prome Minister Evelyn Wever-Croes: --- *E tema aki tin atencion di gobierno riba nivelnan di mas halto
ORANJESTAD (AAN) – Prome Minister a dirigi palabra na pueblo di Aruba, unda e ta mustra su preocupacion encuanto e actonan di vandalismo, cu ta tumando lugar contra SETAR.
“E dianan aki nos por a tuma nota di vandalismo riba lineanan di SETAR. Esaki ta un tema hopi serio pasobra e ta afecta nos economia te na su curazon.
E tema aki tin atencion di gobierno riba nivelnan di mas halto. Nos a pone tur recurso disponible pa investigacionnan cu ta tumando lugar, pa haya sa kico a pasa y ken ta tras di e destruccionnan aki. Pasobra cosnan asina nos no por permiti na Aruba. Tampoco nos no tin agentenan policial pa pone den cada skina di Aruba, pa mira kico ta sosode. Y pesey nos ta pidi comunidad di Aruba pa ta alerta, y si bo mira cualkier cos cu sosode, cu no ta normal, pa bo tuma contacto cu Cuerpo Policial, atravez di e tip lines.
Na e momentonan aki manera mi a bisa, gobierno a pone tur recurso disponible pa atende cu e tema aki. E no ta un tema pa nos bay den panico, pero si ta importante pa sa cu nos tin atencion riba dje na e nivel mas halto, y nos tin tur confianza cu autoridadnan lo sa di yega na fondo di tur esaki, y yega na un paro na esaki.
Mientras tanto, peticion na comunidad di ta alerta y contacta Cuerpo Policial riba cualkier movecion straño cu bo por mira”, e dignatario a reitera.
