ORANJESTAD (AAN): Tabata Diamars anochi, cu Centro di Rescate (RCC) di Guardacosta di Caribe Hulandes, a ricibi un mensahe via Whatsapp for di Havenmeester di Aruba.
Esaki a notifica esnan di Rescate, cu tin un problema e momento ey abordo di un tankero cu ta nabegando den cercania.
E mensahe ta cu e Tankero STI Marshall ta rekesi asistencia medico abordo pa un caso urgente.
E tankero aki ta ancra na parti Noordwest di Aruba, como 5 kilometer leu for di Faro di California.
Mesora Guardacosta di Caribe Hulandes a saca un boto rapido tipo Metal Shark for di nan base na Savaneta, y a percura pa hiba 2 paramedico abordo. Nan a yega na e tankero y a bin haya sa cu tin un persona herida abordo. E herida ta na altura di su lombrishi.
Aki a bin realiza, cu nan no por baha e pashent via e trapi pa yega abao na e Metal Shark. Esey ta loke e funcionarionan eybao a notifica RCC di dje y a mustra cu lo no por bahe di e tankero.
E ora mesora RCC a pone e personal di Helicopter prepara pa lanta vuelo y bay rumbo Aruba pa rescata e victima. Ora e Helicopter a yega, nan a hisa e pashent abordo, y a bay cune rumbo pa Aeropuerto Internacional Beatrix, unda un Ambulans tabata wardando riba dje.
