US Coast Guard a baha lote grandi di cocaina intercepta den Caribe

ORANJESTAD (AAN): Informacion for di Fort Lauderdale ta indica cu e tripulante di e US Coast Guard Cutter,

‘Diligence’ a yega bek na nan pier di Port Everglades, y asina tripulantenan a baha cargamento grandi di cocaina, cu riba caya tin un balor di como 54 miyon Dollar.

   Ta trata aki di 1.871 kilo di cocaina, y e droga aki a wordo acumula di diferente accion contra narcotraficantenan coriendo den speedboat riba Lama Caribe.  Ademas di e casi 2 ton di droga aki, a detene 11 narcotraficante y nan a ser treci Merca unda lo bay hiba nan Corte di Husticia.

   US Coast Guard ta satisfecho cu e cooperacion ricibi di varios partner den Lama Caribe pa yuda captura e droganan aki, y esey ta inclui vigilancia aereo.  Tur cos ta mustra cu e droga aki a wordo captura den area cerca of rond di Puerto Rico y US Virgin Islands.  Nan a hasta intercepta un speedboat cu ta semi-submergibel, cu casi no ta ni visible riba lama.