Universidad di Aruba a celebra 33 aña di existencia

ORANJESTAD (AAN): Universidad di Aruba (UA) recientemente a celebra 33 aña di existencia.

“Pa nos esaki ta un dia special y importante cu nos ta wak bek riba dje na un manera contento y agradecido, mientras cu nos ta wak pa dilanti na un manera alegre”, segun Rector di UA Viola Heutger.

El a splica cu debi na COVID-19 Universidad tabata tin mester di demostra hopi flexibilidad.

Segun Heutger, e Universidad a wak hopi dedicacion di parti di e staff y e studiantenan durante e periodonan dificil di Coronavirus, unda cu tur hende tabata atento pa loke ta e regla y medidanan di COVID-19.

“Nos a wak con contento tur hende tabata pa por a bolbe na e campus y tur tabata dispuesto dimes pa mantene nan mes na e reglanan pa por haci esaki”, segun e rector.

Pa loke ta crecemento di e Universidad, Heutger a splica cu constantemente UA ta sigui crece, entre otro mirando tambe e hecho cu ta ofrece enseñanza di certificado.

Tin tambe plannan pa programanan nobo di Masters riba tereno di Governance y Wiskunde, pa cual tin hopi interes.

“Awor nos ta den combersacionnan tambe riba den ki rumbo nos ta bay, con nos kier sigui crece y unda nos ta wak e Universidad dentro di 4 aña”, segun e Rector, kende a bisa tambe cu e aña cu a pasa tabata tin mas studiante na e Universidad, mirando e problemanan di viahe cu Coronavirus a trece cune.

El a splica cu Universidad tabata tin casi completamente yen cu 200 studiante, pero esaki por a wordo facilita, door cu tabata online.