Unidad di Control di Cacho a captura 4 cacho tur abusa y mal cuida na Tanki Leendert

ORANJESTAD (AAN): Diaranson mainta na altura di e Centro di Control di Cacho na Wayaca, e asina yama “Dog Control Unit” a cuminza na usa pa prome biaha e vehiculo “Unidad di Control di Cacho”.  E proyecto pa recoge cachonan los riba caya a cuminza!

   Diaranson e van a sali pa prome biaha riba caminda, aunke e Unidad si ta activo caba pa algun tempo.  E Van a sali debi na un yamada cu a drenta unda cu lo tin abuso di cacho tumando lugar den un bario.  E doño a duna permiso pa bay cu su cachonan.

   Asina e Dog Control Unit a subi caya pa asina atende e situacion, y asina tur hende a haya un training.

   E ley ta reforza cu autoridad por controla mas, y si acaso hendenan no kier cuminza asumi responsabilidad, kizas e momento a yega pa cuminza duna nan boet.

   Abo como doño di cacho tin di percura pa bo cuida bo cacho, lage den cura y no lage slenter riba caya.  Awor cu e Unidad aki pronto ta saliendo oficialmente riba caya, tuma nota cu cualkier cacho cu nan captura ta cana los riba caya, ta wordo hiba bek pa e Centro di Control di Cacho.  Aki segun ley, e animalnan haya riba caya sin doño, e cacho tin di keda eynan entre 3 pa 10 dia pa asina e doño bin buske.

   Esey ta contrario na si acaso abo ta distancia di un cacho, e chens ta mas grandi cu lo pone bay ‘drumi’ mas liher.

   Diaranson mainta, Unidad di Control di Cacho hunto cu Bureau City Inspector, y encabeza pa Polis y tambe cu DVG a sali rumbo pa e cas.  Tabatin personanan di Aruba Animal Shelter tambe presente.  Algun cacho ta mustra di ta sufriendo di negligencia, algun ta djis weso so nan tin na nan curpa, pues mustra di ta hopi desnutri posiblemente debi na malesa, incluyendo sarna.  Tabatin algun cu hasta tin herida habri full na nan cabez.

   E trahadornan di Unidad di Control di Cacho a yega cu varios haula, pa asina a hinca e animalnan pa bay cu nan.  Tabatin indicacion cu e cachonan cu ta den estado avanza di malesa, lo wordo poni pa drumi, pa asina nan no por sigui sufri mas.

   En total 4 cacho den mal estado a wordo haya na Tanki Leendert. 

   Robby Rosel di City Inspector a indica cu nan ta hayando masha hopi denuncia mes di ciudadanonan cu ta mira actonan ilegal di cacho.

   Tur e cachonan cu a wordo captura na Tanki Leendert, ta wordo treci bek na Centro di Control di Cacho.  Esakinan ta caso di negligencia, y tin di bay studia cada cacho si e ta den bon estado di salud, si acaso e por wordo adopta, etc.

   DIARIO a compronde cu ta via di Bureau City Inspector e tip aki a drenta, y como cu awor nan ta encarga cu e Centro di Control di Cacho, nan a traha mesora riba dje.

   Bo kier yuda? Actualmente tin masha hopi cacho na Aruba Animal Shelter, unda despues di saminacion, nan ta prepara e cachonan aki pa nan wordo adopta pa un famia nobo.  Pesey ora cu bo kier busca un mascota, bay pasa na Animal Shelter pa mira kico nan tin y asina bo ta haci un cacho feliz tambe.