Un total di 62 boluntario a haya nan reconocemento cu nan VOTY Award

ORANJESTAD (AAN): Diasabra atardi na Cas di Cultura, a dirigi tur spotlight riba esnan cu durante aña a sa di sobresali den nan empeño di ta un mihor prohimo,

un ciudadano ehemplar, y a sa di conquista e titulo di “Boluntario di Aña” den e asina yama VOTY Awards, organiza pa CEDE Aruba.

   Esaki a bira e di cinco aña cu Centro pa Desaroyo (CEDE Aruba) ta organizando e premio di Volunteer of the Year Award aki, y e cara di satisfaccion cerca tur esnan cu a wordo menciona, tabata bisa con orguyoso y sigur stimulante ta pa esnan cu a haya e premio.

   Elsa Krozendijk kende ta Project-Coordinator di VOTY Awards pa CEDE Aruba a splica cu e anochi di galardon aki ta ofrece varios Fundacion local y demas instancia riba e isla e chens pa nan por duna reconocemento special na nan boluntario.

   Boluntario ta algo hopi importante den comunidad, specialmente pa e fundacion-, y organizacionnan social, deportivo, y cultural, debi cu unda cu no tin e moda pa busca empleado, semper tin un boluntario cu por yuda.  Nan ta persona cu tin e curazon pa duna nan tempo y conocemento disponible na cualkier cliente of hoben cu mester di un cuido of atencion special.  Nan ta dedica oranan liber pa duna esaki na nan.

   CEDE Aruba ta hopi satisfecho cu pa di cinco aña consecutivo nan a haya un gran respons pa loke ta entrega di e premio aki na un boluntario.

   Pa aña 2022 nan a honra 62 boluntario cu a ricibi reconocemento.  Esaki ta boluntarionan di tur ramo, e.o. di deporte, di scol, di partinan social, di nos grandinan, pues di  tur ramo a sa di mustra aprecio na esnan cu ta yuda cu nan curazon den comunidad.

   E biaha aki a haya menos nomber cu a wordo nomina, pero esaki ta di compronde como cu debi na e pandemia, tin menos instancia caritativo cu ta funcionando e momentonan aki.