Placa cu Aruba mester awe a bay den tram, den fietspad y rotonde --- *Aumento di belasting lo ta devastador pa comunidad di Aruba --- *No por duna garantia di pago cu un entrada cu Gobiernono tin
ORANJESTAD (AAN) — Pa resumi e problema grandi cu Aruba a enfrenta den fin di siman, mester yega na nucleo di e problema actual pero tambe mester atende cu e situacion a base di realidad.
Pa por papia di e problemanan actual cu Aruba tin actualmente, mester bolbe na 2014 ora un rapport di Conseho Social Economico, den cual tur gremio ta representa hunto cu Gobierno, a yega na e conclusion cu Aruba mester economisa.
Esaki ta nifica cu Aruba mester a baha su gastonan manera den e rapport ta wordo trece dilanti.
Ora ta papia di placa, mester mira e realidad. No por gasta placa cu no tin sin saca henter e pais for di balansa.
Ta conoci cu abuso di placa di Aruba a tuma luga na forma barbaro for di 2009. E rapport di 2014 a splica, mescos cu Hulanda a splica, cu mester a economisa pero a sigui gasta placa mientras pa un gran parti ya Aruba a wordo perhudica.
DIARIO a splica na mas cu mil occasion cu no ta awor ta gasta placa di Aruba, pero cu awor mester paga pa loke a wordo gasta sin tene na bista cu ta pueblo mester paga.
Awe Aruba ta den un pandemia. Esaki ta nifica cu Aruba ta pasa den un situacion mundial den cual leynan di emergencia mester wordo aplica.
Por considera e pandemia cu un guera, cu no ta duna indicacion ki dia e lo termina.
DIARIO tampoco ta na fabor pa baha placa di trahadornan di Gobierno. Pero no tin placa pa paga trahadornan pa diferente motibo.
Un pais mester di reserva pa e por sobrevivi cualkier situacion dificil. Aruba no tabata tin reserva pero Aruba tin cantidad di debe.
E reservanan cu Aruba mester a crea, a bay den tram, den fietspad, den rotonde cu fontein.
Tur hende ta na haltura cu esaki ta e problema.
Por papia, por negocia, por haci tur loke kier. Pero mester di un base legal mescos cu Gobierno tabata tin necesidad di un base legal pa por a exigi hende bisti mondkapje, no sali riba caya, no bay traha.
Den e caso aki tambe mester di un ley similar cu por para na cierto tempo cu posibilidad pa alarga dependiente di e situacion.
E ley di emergencia mester duna Gobierno permiso pa baha e gastonan cu e tin na personal pa cierto periodo di tempo, mientras situacion na Aruba ta normalisa.
Na e momento aki no tin seguridad di nada. No tin seguridad di produccion economico na e pais y Gobierno mester tene consideracion cu esaki.
Na e momento aki tin un impase. Un situacion cu no ta culpa di e trahadornan pero di e gobernantenan cu a mara Aruba na debe pa futuro, manera ta e caso di Gabinete Mike.
Aruba por papia y sigui papia. Kico tin dilanti, ningun hende sa ya cu Covid-19 no ta duna ningun seguransa pa e desaparece mientras situacion mundial ta empeora cu e situacionnan actual na Ukraine.
DIARIO ta kere cu mester introduci un ley di emergencia manera pero ta laga e palabra final na Huez, cu sigur den su veredicto mester tene consideracion cu tur aspecto.
Si realmente no por yega na un solucion lo mester aumenta belasting, cu pa nos sinceramente lo ta algo cu lo perhudica Aruba cu ya tin problema serio den casnan di famia, den negoshinan cu pandemia a kibra!
