ORANJESTAD (AAN) – Garreth Tromp, Epidemiologo di DVG, a participa den e conferencia di prensa di gobierno, Diahuebs anochi, unda el a duna un update.
Tromp a menciona dos aspecto hopi importante, cu ta na prome lugar, e variante omicron. Manera ta basta conoci caba, den e ultimo simannan di 2021 Aruba a bay di 25% di tur e contagionan di omicron, pa riba 98% na final di 2021. Garreth Tromp a splica cu esaki tabata un transicion di un poco mas di dos siman, y loke omicron a trece cune ta cu e ta parce un variante mas supple pa esnan cu ta haye, unda menos frecuente nan ta bira hopi malo of mester wordo hospitaliza.
Esaki ta trata no solamente di e caracteristicanan mes di e virus, pero e tin di haber, eigenlijk tambe, cu e sistema immune di e persona mes, combinando inmunidad door di e vacuna cu e inmunidad adkiri door di contagio di covid-19.
Tin algun efecto cu tin influencia riba e proteccion di e persona: por ehemplo, edad, si el a wordo contagia recientemente cu covid-19, si e ta sufri di algun malesa cronico, y cuanto tempo pasa el a haya su ultimo vacuna.
El a agrega cu pesey ta hopi recomendable cu personanan di edad halto, of cu tin un condicion existente caba di salud (malesa cronico), si no a tuma e booster shot, haci esaki.
Si e persona a haya covid recientemente, tambe ta recomendable pa haya e booster shot aki un par di luna.
Garreth Tromp a splica dos grafico, un di nan tocante e mortonan causa pa covid-19. E punto mas importante pa compronde di e grafico aki, el a splica, ta e co-relacion entre e linea preto y balki blou. Usando grafico Tromp a comenta tocante e infeccionnan cu a pasa den tur siman, y e mortonan di tur siman. Por mira cu Delta a dal comunidad basta duro pa loke ta trata e fayecimentonan. Ademas, el a mustra cu tabata tin hopi mas infeccion cu omicron cu durante e periodo di Delta, pero apesar di esaki mucho menos persona a fayece di covid-19. Esey ta mustra tambe, el a bisa, cu un infeccion no ta mesun streng protect, si e persona ta bay tin mester di cuido medico of e por fayece di covid.
Tambe el papia tocante e personanan cu mester a wordo interna den piso na Hospital door di covid-19, y esnan cu a wordo interna den UCI door di e virus. Tromp a indica cu tin e mesun tendencia di aumento di casonan door di omicron, pero menos caso cu tabata tin mester di cuido medico na Hospital.
