Un ex-docente cu amor grandi pa educacion a fayece

Ainda como pensionado e tabata sigui yuda

• Docente y alumnonan di Scol Basico Xander Bogaerts ta tristo
• Meneer Priam ta bay laga un legado atras 

ORANJESTAD (AAN): Siman pasa, tur e team di docente y alumnonan di Scol Basico Xander Bogaerts na San Nicolas, a ricibi e tristo noticia di e fayecimento di meneer Franklin Priam, mihor conoci na scol como ‘Meneer Priam’.

   E tabata un noticia cu a laga curason di e scol hopi kibra. Meneer Priam a bay laga tur hende, pero su memoria lo keda bibo y hamas nan lo lubid’e.

   Como pensionado: Meneer Priam a baha cu pensioen, pero pa sorpresa di tur hende, ta casi tur dia e tabata na scol. E tabata pasa scol pa mira cu kico e por yuda.  E ta bin scol cu su tas di almuerzo den man y e werksternan tabata prepara su te, y asina meneer Priam tabata bin desayuna na scol. E no tabatin pura pa bay.

   Y ora e no bin scol, esnan di Scol tabata yame via telefon pa mira kico a pasa cu e no ta na scol. Coleganan por a acerc’e y cu hopi atencion e tabata scucha y duna conseho.  Ta na numeroso ocasion, Meneer Priam a drenta klas pa algun siman pa yuda scol. Siña, y educa mucha tabata su pasion.

   Tabata bunita pa mira con Meneer Priam tabata busca tur manera con pa yuda un mucha cu un materia cu tabata dificil. Durante pauze, semper por mira con e muchanan ta sinta rond di dje y nan ta combersa. Esey tabata Meneer Priam! Un persona simpel y di bon curason. Un bon ehempel cu el a laga atras pa nos.

   Su ‘caligrafia’: Na comienso di tur aña escolar e tabata skirbi palabranan di animo pa e muchanan y tabata pinta riba e borchinan di entrada di scol.  E tabatin un habilidad impresionante di pinta, y tambe di domina un bunita ‘caligrafia’ sea cu pen, krijt, of kwashi.  E tabata super bon den esaki! No solamente na comienso di aña escolar pero pa tur otro actividad cu Scol Basico Xander Bogaerts tabatin.

   Meneer Priam tabata skirbi e nombernan di alumnonan riba e certificadonan di klas 6 y e diplomanan di klas 5. Un bunita trabao.   Ta conoci cu otro scolnan tambe tabata pidi’e y semper e tabata cla pa yuda.  E ta yuda semper ora tin School Reis pa yuda supervisa e alumnonan, of ora di bay mira pelicula hunto.  Y asina por skirbi hopi mas tocante meneer Priam. Su dedicacion na enseñansa tabata tremendo.

   Docente y alumnonan a stima Meneer Priam na bida y lo sigui stim’e, aunke e no ta hunto cu nan mas den presencia. Danki pa tur cos cu bo persona a haci pa scol durante e tempo cu bo tabata cabesante. Ainda tin mayornan y alumnonan cu ta corda bo cu hopi respet y amor.

   Siman pasa durante anochi di ‘graduacion’ di e alumnonan di 6de Klas na Renaissance Convention Center, tur alumno, docente-, y mayornan presente a lanta para pa tene un minuut di silencio, sigui despues cu un aplauso inmenso pa gradici Meneer Priam pa tur cos cu el a haci pa educacion na Aruba.

   Na su yiunan Indira, Stefany, su rumanan y henter famia condolencia y hopi forsa den e dianan dificil boso dilanti. Meneer Priam sosega dushi den brasanan di nos Señor.  E mensahe di Scol Basico Xander Bogaerts ta: “We will miss you very much”.

  Franklin A. Priam a nace na Aruba dia 28 di November 1951, pues tin 72 aña di edad.  El a haya su educacion na Colegio Arubano, y despues na Academia Pedagogico Arubano (APA), unda el a bira docente.