Segun Statuut cierto asuntonan di Aruba den man Hulandes --- *Ollongren y Hoekstra encarga cu Defensa y Asuntonan Exterior --- *Knops reemplasa pa Secretario di Estado conocedor di batata cayente
ORANJESTAD(AAN)—E prome fin di siman di 2022 tabata den cuadro di formacion di un Gobierno nobo pa Hulanda.
Pa Aruba e hecho cu e proceso electoral na Hulanda a yega na un conclusion, ta hunga un papel sumamente importante, no solamente pa e hecho cu lo tin un gobernante Hulandes encarga cu e relacionnan entre Aruba y Hulanda.
Ora papia di gobernantenan nobo pa Hulanda ta papia di cambio den e constelacion di Gobierno di Reino, cu segun Statuut ta encarga cu cierto carteranan importante cu no conoce un Ministerio na Aruba.
Pa DIARIO tabata sumamente importante cual ta e personanan cu lo ta encarga cu Defensa y cu Asuntonan di Exterior, cu ta asuntonan di Reino aunke den Reino a yega na cierto acuerdonan cu a duna e paisnan cierto participacion den e asuntonan aki.
Naturalmente ta sumamente importante pa tuma nota, kende lo atende directamente cu e relacionnan entre paisnan den Reino, cu sigur ta hala atencion na prome lugar pasobra nan ta atende cu asunto di placa. Y placa ta keda placa.
Pero prome cu bay atende cu e Ministronan mes, mester realisa cu entrada di un Gobierno nobo pa Hulanda ta nifica entrada di e mayoria di Ministronan cu ta forma e Gobierno di Reino, cu conoce como Hefe di Estado Rey Willem Alexander y ta entrega na ciudadanonan di Reino e nacionalidad pasaporte Hulandes.
Na momento cu e gobernantenan nobo di Hulanda keda encarga cu nan puesto, hunto cu e Ministronan plenipotenciario di Aruba, Curacao y Sint Maarten nan lo ta e Gobierno di Reino, cu no conoce un Parlamento di Reino.
E futuro Ministro encarga cu Defensa di Reino, ta Kajsa Ollongren kende no ta desconoci cu e islanan Hulandes den Caribe ya cu ainda e ta ocupa cu e cartera di Ministro di Relacionnan den Reino cu diariamente a atende mas tanto cu Raymond Knops como Secretario di Estado di Relacionnan den Reino.
Kajsa Ollongren como Ministro di Defensa di Hulanda y di Reino Hulandes, ta encarga cu tur loke ta resorta bou defensa di Aruba den un situacion mundial y regional, cu ta tenso pero a perde atencion den e Pandemia di Covid-19.
Defensa Hulandes mester garantisa e integridad nacional di Aruba como parti di Reino tambe enfrente situacionnan manera e pretencion di Nicolas Maduro cu e tin cierto derecho riba e islanan Hulandes dilanti Venezuela.
E relacion cu Venezuela y cu otro paisnan na mundo, no ta desconoci pa Stef Blok, cu prome cu Covid-19 tabata trata na yega na un tipo di lazo cu tono romantico cu Nicolas Maduro, aunke Hulanda mes ta rechasa Nicolas Maduro como presidente di Venezuela.
E Ministro nobo pa Asuntonan di Exterior lo ta Wopke Hoekstra.
Den e articulo aki nos kier mustra cu un Gobierno nobo pa Hulanda sigur ta importante pa Aruba, cu no tin su propio Ministro di Defensa ni di Asuntonan di Exterior bou cual embahada y consulado ta resorta.
Awor e relacion directo entre Aruba y Hulanda pa asuntonan di placa, ta yega na su turno.
Raymond Knops, cu a reemplasa Plasterk como encargado Hulandes pa percura pa Aruba cana financieramente for di 2014, ta despedi.
Knops tabata Secretario di Estado encarga cu Relacionnan den Reino y ta wordo reemplasa dor di un dama, cu te na final di e actual gobierno di Rutte ta encarga cu un batata cayente na Hulanda, cu ta e asunto di Toeslagen.
Alexandra van Huffelen sigur no mester wordo mira como un formula pa Aruba haya asistencia financiero mas facil di Hulanda. E tabata encarga cu asuntonan financiero di Hulanda como Secretario di Estado, cu sigur no tabata facil.
Den Gobierno di Reino, 2022 lo entrega exigencia unico na e Ministro Plenipotenciario di Aruba, Besaril, cu tambe lo tin e encargo grandi pa Arubianonan na Hulanda den situacionnan internacional importante cu por spera na 2022.
Cu entrada di 2022, Aruba ta enfrenta un reto nobo den su relacionnan cu Reino y DIARIO lo sigui informa Aruba di tur desaroyo.
