E relato di Comision di Supervision na un momento crucial den Reino
- Base di Gobierno di Reino no a splica su plan pa Relacion den Reino
- Den anuncio di carteranan poco atencion pa cartera mara na Statuut
ORANJESTAD (AAN) Cuanto balor ta wordo duna na un persona of organisacion, sigur ta bini dilanti den relatonan di presentacion di e personanan of organisacionnan.
Siman pasa DIARIO a anuncia cu den tur e informacionnan cu tabata nace a base di e finalizacion di negociacionnan pa formacion di un Gobierno Hulandes, cu lo bira tambe Gobierno di Reino, no tabata topa practicamente cu e nomber di e persona cu lo keda encarga cu e tarea di Secretario dfi Estado van Huffelen y cu ta directamente mara na Statuut.
E forma cu e dirigente di asuntonan cu ta mishi cu e relacion oficial y legal entre Aruba y Reino Hulandes a bini dilanti, na nos parecer ta mishi directamente cu e balor cu e cartera aki mester tin den Gobernacion di Reino, ya cu e ta atende directamente cu e existencia dfi gobernacion di Reino.
Ora papia di Reino Hulandes, no ta papia di Hulanda. Ta papia di Hulanda (cu un relacion special cu Islanan BES) y di Aruba, Curacao y Sint Maarten, cu ta islanan autonomo den maneho riba diferente tereno, pero parti di un solo Reino, cu ta dicidi pa varios factor importante.
E Gobierno cu wordo eligi na Hulanda, ta bira automaticamente e base di e Gobierno di Reino, cu ta wordo amplia cu Ministronan Plenipotenciario di Aruba, Curacao y Bonaire.
Pais Aruba no conoce ciudadano Arubano. Pais Aruba no tin un ehercito. Pais Aruba no tin un Relacionnan directo cu Exterior riba su mes.
Esaki ta haci cu ora Gobierno di Reino a bira conoci, e Gobierno cu ta dicidi pa Aruba tambe, a bira conoci.
E Ministronan Hulandes, hunto cu e Ministronan Plenipotenciario ta forma e Conseho di Ministro di Reino parti democratico di e Gobierno di Reino, cu Su Mahestad Rey Willem Alexander, na cabez.
Kende ta encarga cu Relacionnan den Reino, sigur mester ta mes importante pa wordo anuncia ora e totalidad ta wordo presenta.
Den pasado esaki semper a socede pero no tabata e caso durante e ultimo formacion.
Tabata conoci cu Asuntonan di Interior (Binnenlandse Zaken) di Reino, bou cual naturalmente como parti di Reino, Aruba mester pertenece, lo a wordo yena pa e partido nobo NSC di Pieter Omtzigt.
E funcion di Secretario di Estado cu ta wordo eherce actualmente pa Alexandra van Huffelen y manera a nota semper ta di sumo importancia den Reino, ni sikiera a wordo menciona.
Continuamente a papia di Binnenlandse Zaken tanto pa e Ministro como e Secretario di Estado pa Asuntonan di Interior.
Esaki a haci cu na cierto momento por a tuma nota den publicidad cu e Relacionnan den Reino ta parti di e portafolio di Digitalisacion.
Na cierto momento a yega asina leu cu e formacion cu a wordo splica cu e Gobierno Hulandes nobo dirigi pa Ministro Presidente Dick Schoof, lo tin como Ministro di Asuntonan di Interior, Judith Uitermark di NSC di Omtzigt.
Pa reemplaza Alexandra van Huffelen, lo tin e representante di e partido di Geert Wilders (pues PVV), e experto di asuntonan digital Zsolt Szabo, kende lo keda encarga cu ademas di asuntonan di Digitalisacion, e Relacionnan den Reino.
Pues di e forma aki Aruba a tuma nota cu Relacionnan den Reino, den Gobierno di Reino, realmente no tin necesidad of balor pa wordo menciona mescos cu por ehempel ta anuncia tur otro Ministerio.
Algo cu sigur a salta na bista ya cu e Gobierno di Reino ta responsabel pa e ciudadano di Reino, cu mester wordo proteha dor di Reino y mester busca su bienestar directamente cerca Reino como portador di e Pasaporte di Reino, cu ta identifica su nacionalidad.
Con importante e relacionnan entre Aruba y Reino ta, sigur a bini dilanti durante ultimo añanan.
Ta di lamenta cu den e lista cu ta regla e personanan encarga cu asuntonan di Relacionnan cu Aruba tambe, no por identifica sin mas e persona encarga cu e relacionnan aki. Esaki por wordo splica hasta como indicacion cu digitalisacion mas importante cu relacionnan den Reino.
Ta den e situacion aki, Aruba mester ta sumamente contento, cu ora e representantenan di Reino atende cu Aruba, e representantenan di pais Aruba por entrega prueba, con Aruba a atende cu su problemanan na un forma ehemplar pa Reino.
Ta den e situacion aki, Aruba ta orguyoso pa bisa cu el a baha su desempleo na forma increibel. Cu su entrada ta cubri su gasto y e ta paga su debenan.
Ta cu resultado favorabel di un bon maneho, Aruba ta en espera di e prome bishita di representantenan di Gobierno di Reino!
