Riba e caminda di recuperacion cu peliger continuo di Covid-19 un bon desaroyo - *Crecemento offshore di Aruba tabata prueba di e importancia relacion cu Reino - *Kico lo a pasa si Aruba a pretende di bay renegocia e acuerdo alcansa cu Hulanda?
ORANJESTAD(AAN)—Ningun pais na mundo ta sigur kico exactamente futuro lo trece. Duda grandi ta existi mientras na cantidad di pais, e tercer ola di Covid-19 a presenta su mes y a stroba pa tur pais por a conoce e grado di vacunacion cu a wordo planea.
Un cos ta sigur rond mundo. Paisnan cu nunca a conoce debe y hasta a scrap debe como nan maneho, mester a a acepta cu debe grandi ta yuda nan pasa den e crisis severo cu e coronavirus nobo a crea.
Na 2020, ora Aruba a bati na porta di Hulanda pa por sigui cana financieramente, hopi a wordo papia y bisa di e areglo basico cu Aruba y Hulanda lo mester a firma. Un areglo den cual e palabra “autonomia politico” a haya un prome luga mientras e autonomia financiero cu ta dicidi riba e autonomia politico di tur pais, a bira un discusion y hasta un herment.
Durante eleccion por a scucha politiconan cu a pretende cu nan lo por a bay habri discusion nobo cu Hulanda riba e forma di asistencia cu a wordo alcansa.
Partidonan manera AVP a bay eleccion cu e siguransa cu nan ta bay discuti de Acuerdo cu Hulanda y yega na negociacion nobo. Mientrastanto Pueblonan di otro paisnan den Reino tabata aplaudi Evelyn Wever-Croes pa e forma cu el a atende cu Hulanda y a sigura cu asina Aruba por sigui cana den un futuro domina pa loke ta pasa cu Covid-19.
Awe e momento a yega realmente por evalua e decision di Prome Ministro Wever-Croes di sigui negocia cu Hulanda, pero di acepta cierto condicionnan cu Hulanda pa asina Aruba por a haya asistencia.
Prome Ministro Wever-Croes a gana respet den Reino ya cu e no a pone resultado di eleccion su dilanti y asina dicidi con e lo confronta Hulanda, pero a base di negociacion den un bon ambiente cu Hulanda, habri caminda pa awe Aruba por tin sosten Hulandes.
Kico esaki ta nifica pa Aruba awe?
Covid-19 tin Aruba y henter mundo den un suspenso total. Medidanan mester wordo tuma. Medidanan cu por bay tur direccion cu Covid-19 exigi.
Hopi bez mundo a papia di e tercer ola di Covid-19 na paisnan cu a tuma medida como algo cu por presenta durante e parti mas laat di 2021 pero no a pensa cu el a plama na e forma cu e ta plama.
Aruba awor ta haya confirmacion cu Prome Ministro Wever-Croes a asumi e postura adecuado ora el a nenga di bay guera cu Hulanda pa hunga politica of pa haya mas voto den eleccion.
Por deduci cu Evelyn Wever-Croes tabata sincero cu Aruba den e forma cu el a atende cu Hulanda y cu awe ta haci posibel cu den un brote nobo di emergencia di Covid-19 Aruba tin Hulanda.
Pa comprende kico esaki ta nifica, mas leo cu solamente asistencia directo Hulandes, mester mira kico e relacion entre Aruba y Hulanda a nifica pa e crecemento di companianan offshore por ehempel na Aruba.
E hecho cu Aruba tabata parti di Reino y cu leynan basa riba e concepto legal Hulandes, a haci cu Aruba por a bira un centro di actividad financiero.
Awe e relacion Aruba y Reino no solamente a haci posibel pa Aruba por sigui cana. E relacion cu Hulanda lo yuda Aruba yega na e orden financiero nobo cu e pais mester, mescos cu tur pais na mundo cu mester a haci debe grandi.
E relacion Aruba y Reino ta yuda Aruba atrae inversionistanan cu ta presente rond mundo, cu ta prepara den pandemia pa e tempo despues di pandemia, den cual economia mundial lo ta adapta na e normanan nobo cu e mundo despues di Covid-19 lo exigi.
Awe e Acuerdo entre Aruba y Reino ta haya un nificacion sumamente importante y ta un siguransa pa Aruba, cu ta den gara di un ola nobo di Covid-19 cu ta exigi mas cu nunca cooperacion mundial pa por sigui cana.
