ORANJESTAD (AAN): Un persona cu ta test y cu ta sali positivo pa Covid-19 lo haya un email unda ta para kico precis e tin cu haci e momento ey.
Sharline Koolman di Departamento di Salud a indica cu te cu aworaki ta logrando contacta tur persona cu ta un caso positivo nobo riba e mesun dia. Pero si e cifranan pa dia keda subi posiblemente, e yamada riba e mesun dia, door di un persona di DVG lo bira algo dificil pa motibo di e cantidad di hende.
Pero el a remarca e hecho cu riba e email, unda ta informa e persona di e resultado, ta bisa bon cla kico e persona mester haci manera bay den isolacion.
Ora cu DVG yama, e personal lo por haci algun pregunta riba por ehempel con e isolacion tin cu bay. Pero e ta bay mas tanto pa e persona haya informacion riba unda, ki dia, si tabata tin contacto cu mas persona, etc pa asina por wak ki dia e persona tabata positivo caba y e dianan cu e sintomanan a cuminsa, a bisa.
Segun Koolman, entre mas informacion e persona por duna, mas mihor DVG lo guia bo den e proceso.
E protocol ta keda manera cu e tabata semper. Bay den isolacion. Mantene na e reglanan di higiene pa e persona mes y pa e famia of esnan cu ta biba den e cas. DVG lo yama bek pa wak si acaso e sintomanan a termina. A base di esey lo dicidi ki dia por sali for di isolacion.
E protocol aki ta conta pa esnan cu ta vacuna of cu no ta vacuna, Sharline Koolman a remarca.
Un persona cu ta vacuna y cu no tin sintoma di Covid-19 e por traha. Pero e momento cu e tin sintoma, e ta bira un caso riba su mes y mester cuminsa haci test.
Sharline Koolman a splica cu e unico diferencia ta cu e persona cu no ta vacuna, e si tin cu bay den cuarentena di biaha.
