Poder ta wordo regla den un pandemia cu a transforma mundo --- *Ora midi e balor actual di Ukraina cu e balor di Japon na 1945 --- *Mobilisacion y un malesa contagioso den mundo sin lider firme
ORANJESTAD (AAN)- Na 2019 mundo tabata tin manualnan prepara pa yega na diferente punto den un situacion cu hopi bez DIARIO a splica.
Tin e manual di Nacionnan Uni pa yega na un mundo sin miseria na 2030. Tin e manual cu ta atende cu e transferencia di economia na un generacion nobo na 2025. Tin e manual di Inteligencia Artificial. Tin e manual pa cambio di clima y asina por sigui.
DIARIO for di 2019 a splica Aruba contenido di tur e manualnan aki cu ta basa riba cambio na mundo pero principalmente cambio di liderazgo, cambio den economia manera sigur ta e caso cu asunto petrolero.
Ora papia di 2025 como punto caminda lo a papia di liderazgo economico, mester mira atras riba economia manera e tabata for di Segundo Guera Mundial ora un reconstruccion economico a tuma lugar.
Reconstruccion economico ta nifica pues reconstruccion di e nucleo rond cual mundo ta dal buelta pasobra e ta regla actividadnan economico cu ta genera placa, cu ta necesario pa tur logro na tur pais.
Ora tira un bista riba podernan mundial cu a nace for di Segundo Guera Mundial, ta mira na Europa e poder enorme di Union Sovietico y un Europa destrui den guera pero ta busca su forsa den e unificacion den Union Europeo.
E forsa sigur di Union Europeo ta e Euro. E bloke Europeo a crece den forsa despues di Segundo Guera Mundial y ora otro partinan di mundo atende cu Europa mester atende cu un union.
Prome cu Union Europeo, ta mira e poderoso Union di Estadonan Mericano, cu ta Merca, Union Sovietico y China. Tres teritorio enorme, cu recursonan natural diverisifica y cu forsa pa enfrenta otro.
Na final di Segundo Guera Mundial, Merca a a debolbe libertad na Japon, cu a bira un aliado di Merca na un punto estrategico na Asia.
E Union Europeo a uni cantidad di paisnan chikito y sin duda e introduccion di Euro a hunga un papel importante.
Inglatera a bolbe na su posicion special como Europa y no Europa.
Mencion di e paisnan aki, sinembargo, no mester deshaci di otro gigantenan economico na mundo manera India, e continente Africano caminda e poder di petroleo ta papia.
Despues di Covid-19, cambionan economico lo mester guia mundo na un futuro nobo.
E fin di Union Sovietico no tabata loke e dirigentenan cu a uza e sentimento di e clasenan mas pober na mundo, a visualisa.
Historia di mundo ta basa riba imperionan cu Hitler a busca cu e creacion sangriente y horroroso di Tercer Imperio.
Union Sovietico por a wordo reforma na forma facil sin Union Europeo, cu si mester tene na consideracion cu parti di Alemania te e ultimo decada di Siglo 20, tabata conoce dominio Ruso.
E crisis actual na Ucraina a surgi den un pandemia den cual contra tur regla pa enfrenta e Coronavirus, mester uni tropa pa mobilisa. E resultado pa Covid-19 sigui plama ta un pregunta serio.
E menasa di Rusia, ta tuma lugar na un momento cu final di e pandemia lo nifica un mundo renoba, den cual economia ta hunga un papel sumamente importante sigur si tene na consideracion e capital inmenso cu mester wordo hinca den cambio di clima.
Rusia ta un pais petrolero y un pais cu ta produci gas y cu ductonan importante pa paisnan Europeo, cu tambe ta na wega den e crisis actual.
Sinembargo, e emergencia mas grandi pa Rusia ta, pa Ucraina no bira bira di Union Europeo cu asina por conta cu e poder economico inmenso di Ucraina cu hunto cu Rusia tabata e gigantenan economico di Union Sovietico.
Despues di Segundo Guera Mundial, Japon a bira di inmenso balor pa Merca ya cu e tabata situa na un punto estrategico na Asia.
E situacion ta serio debi na e realidad complexo di e crisis cu tin interesnan serio como base, manera DIARIO lo sigui informa na momento cu Covid-19 a cambia e panorama financiero mundial cu cantidad di prestamonan di cantidad di paisnan grandi, cu mester a pone placa riba mesa pa enfrenta e malesa.
