Uno di e preguntanan cu a tene mundo ocupa for di 2014 --- *Contacto directo Rusia, Venezuela y Cuba den conflicto actual --- *Vladimir Putin por conta cu Honduras y mas pais den region
ORANJESTAD (AAN) — Kico ta pasa dilanti costa di Aruba? Un pregunta cu ta bira cada rato mas urgente mientras DIARIO ta atende cu su informantenan na nivel internacional importante.
Na momento cu mundo a cuminsa papia di e desaroyonan na frontera di Ucraina cu ta rondona pa tropanan di Rusia, DIARIO ta den contacto cu su informantenan mas importantepa por analisa tur aspecto di e suceso, cu Aruba no por ignora.
Durante ultimo dianan, na un forma mas intenso DIARIO a sigui indaga den e forma cu e relacionnan entre Cuba, Venezuela y Rusia por tin pa Aruba, cu tambe ta den un situacion similar cu Ucraine.
E problema actual ta e reclamo di Rusia pa haci Ucraina parti di teritorio Rusia, cu ta comparabel cu e ponencianan directo di Nicolas Maduro cu e islanan ABC ta pertenece na Venezuela.
Na varios occasion informantenan a tene DIARIO na haltura di situacion di alerta ora refugiadonan tabata yega costa di Aruba y e peligro tabata existi cu entre e refugiadonan aki por tabata tin hende di Nicolas Maduro tambe.
E interes di Nicolas Maduro cu no tabata tin placa pa haya Citgo, sigur mester keda na mente di Aruba, cu actualmente ta situa dilanti uno di e paisnan di mayor sosten pa Rusia, cu ta Venezuela.
For di 2014 diferente publicacionnan internacional cu insistencia a papia di e relacion entre Rusia y Venezuela, pero tambe cu Cuba y Nicaragua cu tin lazonan directo cu Rusia, manera informantenan ta insisti.
Publicacionnan internacional di ultimo dianan ta papia directamente di e lazo cu tin entre Venezuela y Rusia y ta rebiba e pensamento cu ta existi for di 2014, cu Rusia por entrega su pasion pa Ucraina a cambio di e hecho cu Merca y paisnan liber, ta permiti desaroyo di Venezuela den un estado satelite abierto di Rusia.
DIARIO durante ultimo dianan a acumula copianan di informacionnan serio cu a wordo publica na nivel internacional den cual e relacion entre Venezuela y Rusia ta bini na prome lugar.
Con peligroso e situacion ta real,mente pa Aruba, ta e pregunta cu DIARIO ta haci na diferente informantenan pa por a analisa e realidad actual pa Aruba.
Na prome lugar ta bini dilanti, cu Prome Ministro Wever-Croes tabata tin mas cu razon pa tene e portanan di Aruba cera pa Nicolas Maduro. Si e frontera entre Aruba y Venezuela a keda habri, Aruba lo ta den un peligro serio.
Den un analisis cu DIARIO a realisa cu expertonan riba e tereno ta bolbe na e momento cu barconan Ruso a yega Cuba, cu a bira e satelite di Rusia dilanti e costa di Merca pero tambe den curason di Caribe.
Ta for di Cuba, Rusia a expande su teritorio riba continente Mericano y awe na cantidad di pais Latino Americano tambe tin su contactonan.
Analisis di informacionnan concreto pa medio di medionan internacional ta indica con te awor Putin ta tene tanto Nicolas Maduro como Miguel Diaz di Cuba personalmente na haltura di sucesonan den e conflicto di Ucraina y ta sigura cu e por conta cu nan.
Ora analisa informacionnan cu DIARIO a ricibi, tin mas cu suficiente motibo pa e Arubiano y Aruba a alerta di e situacion mundial actual y sigur asuntonan cu no a haya atencion di Aruba, cu kier a trece Citgo Aruba a base di un contracto cu Nicolas Maduro, cu tabata directamente na servicio di Vladimir Putin.
DIARIO lo sigui informa Aruba y analisa e situacion cu exigi pa paz y trankilidad reina na Aruba.
