Turtugaruba a bolbe entrega keho tocante cachonan riba beach

ORANJESTAD (AAN)- Tur e diferente turtuganan cu ta pone webo na nos isla ta den peliger di extincion. Turtugaruba ta preocupa di mira cachonan na eagle beach

cu ta trapa y asta drumi riba neishinan di turtuga y cu ta bira teritorial ora voluntarionan ta bini pa inspecciona e neishinan pa posibel buraco di “hatchlings”.

            Turtugaruba a pidi Unidad di Control di Cacho un biaha caba pa piki e cachonan na eagle beach. E Unidad a tuma contacto cu conocirnan di e persona cu a opera e cachonan aki pa e busca un solucion pa nan paso e cachonan no por keda eynan. E señora a bin Aruba y a gasta basta placa pa percura pa su 3 cachonan no yega den e area mas.

            Pero a keda mas cacho. Turtugaruba a bolbe acudi na e Unidad di Control di Cacho. E Unidad a informa tur fundacion cu ta bringa pa cacho na Aruba pa busca un solucion paso e fundacionnan ta treciendo un berdad falso riba diferente plataforma social cu e Unidad di Control di Cacho ta piki cacho pa mata nan. Esey no ta berdad!

            Ora e Unidad di Control di Cacho piki un cacho, ta hiba e cacho na e Centro di Control di Cacho. Eynan e persona na encargo di e centro ta wak si e cacho tin un microchip. Si ta asina ta mas facil pa localisa e doño pa e responsabilisa su mes pa su cacho. Si e cacho no tin doño ta purba haya un hogar p’e, pero solamente si e cacho no ta agresivo. Si e cacho ta agresivo no ta keda nada otro cu pone e cacho drumi.

            Tin un Ley di Cacho cu ta na vigor desde 2015. Awo cu tin tur herment pa e ley wordo enforsa tur hende mester tene nan cacho den cura pa evita un multa indesea.

            Mester un solucion urgente si pa e cachonan cu ta supuestamente sin doño riba eagle beach. Tin baki di cuminda pa e cachonan riba beach pues e persona aki cu ta duna nan cuminda por hiba e cachonan i hinca nan den su cura.

            Ban tur hunto soluciona e problema di cacho riba caya. Ban tur hunto ta mas responsabel cu nos mascotanan. Sterilisa bo mascota pa e no contribui na e gravedad di e problema. Si bo tin espacio y e manera financiero pa tuma un cacho, adopta un of mas. No rasa bo cacho y despues no sa kico pa haci cu e puppynan. Ban tur hunto ta mas consciente di nos responsabilidad di tin un mascota. Si bo no por ta un bon doño haci e escogencia responsabel pa no tin mascota e ora.

E Unidad di Control di Cacho lo sigui atende cu kehonan cu nan ta ricibi. Cacho den cura, ley e ta!