ORANJESTAD (AAN): Diasabra mainta pa merdia tur cos tabata mustra netchi na tanto Baby Beach como tambe na Rodgers Beach.
Varios persona a bay lama pa asina core un poco di e calor inmenso cu ta haci den dia.
Un grupo di turista procedente di Europa tambe a yega na Baby Beach, y cu hopi entusiasmo a prepara pa nan drenta e lama trankil eynan pa asina snorkel un poco. Nan a keda snorkel na superficie ta admira e bida marino cu tin eynan.
Diripiente uno di nan a hisa cabez for di bao awa, y a mira cu uno di nan tabata keto y ta drief, sin duna reaccion. Mesora a hala atencion di e otronan. E turistanan aki mes a gara e homber y a cuminza landa bay direccion di canto pa dune yudanza.
Ora di yega na tera, a bin nota cu e persona aki no ta halando rosea. Usando nan conocemento basico di practica CPR, nan a cuminza haci esaki pa yude recupera. Hendenan eybanda a core yama tanto Polis como Ambulans pa bati alarma.
Asina pa 1:30 pm, Central di Polis a core dirigi un unidad di Polis di San Nicolas cu urgencia pa Baby Beach pa check kico ta pasando.
Ora cu unidad di Polis a yega na e lugar, nan a bin topa cu hendenan riba beach ta dunando keto bay CPR na un turista masculino.
Papiando cu esnan presente, e turistanan a splica cu durante nan ta snorkel, na dado momento a ripara e turista masculino ta drief. Di biaha a sake for di lama y a cuminsa cu CPR inespera di Ambulance.
Paramediconan di Ambulans di ImSan a yega na e lugar tambe, y sin ningun tardanza a tuma over y a trata na re-anima e turista, y conecta machine pa monitor su curazon. Pero lamentablemente no por a haci nada mas.
A keda nada otro pa pidi Centro di Alarma manda busca Docter. Tanten cu un Docter no yega, regla na Aruba ta cu no mag di kita e persona di eybao. Tabatin algun hende cu a critica esey, pero pa hopi decada caba asina ley ta na Aruba.
Di e forma ey, te despues di casi 80 minuut un medico a yega. Pa 2:55 pm, Dr. Texier a constata morto di e turista masculino di 58 aña di edad naci na Hulanda. E ora si a manda busca un Agencia Funeraria pa busca e restonan mortal di eybao. Contrario na otro paisnan, Aruba no conoce e sistema di ‘Coroner’ cu ta encarga pa recoge hende morto. Aki ta un Funeraria tin di bin haci esey.
Como cu e demas personanan a keda den shock y spanta, Bureau Slachtofferhulp a presenta na e lugar pa asina guia e famia den e momentonan aki.
Na famia di e fayecido, tanto DIARIO como Polis ta manda palabranan di condolencia.
