E ta pidi Guarda Nos Costa pa respeta ley:
ORANJESTAD (AAN) – E ciudadano señora Rosaura Groeneveldt a dicidi di papia cu prensa, pa papia enberdad kico ta e situacion di su pareha cu ta deteni den Huis van Bewaring, loke pa Groeneveldt a bay contra ley. El a contacta cu prensa pasobra e ta sinti cu “ya ta momento pa papia, pasobra ‘suficiente ta suficiente’!”
Esaki relaciona cu e detencion di un persona Dominicano pa Guarda Nos Costa, cu ta e tata di e baby di señora Groeneveldt, locual a keda demostra pa medio di un test di DNA, y e pareha tin intencion di contrae matrimonio.
E meneer su nomber ta Ariel Lopez, cu ta conta cu su pareha a bin Aruba y mesora e famia a pidi un permiso di estadia pe, y esaki a wordo nenga.
Rosaura ta conta cu dia 1, cu el a drenta, mesora a hinca un permiso di estadia pa e persona, pero el a wordo nenga. Nan a bay di acuerdo cu esey, y a haci un apelacion na LAR, pero lamentablemente, pa falta di informacion e no tabata sa cu mientras cu e proceso tey, por a hinca un otro permiso; no obstante el a haci esey. Tur hende cu ta pidi permiso pa un persona stranhero na Aruba, sa cu tur proceso ta costa hopi placa, pero asina mes a pidie.
E dama a duna di conoce tambe, cu e tin e resultado di ADN di e mucha, e inscripcion na Censo cu e ta reconoci pa su tata, e gezag di Corte, y tur esaki ta rekeri di hopi placa pasobra tur documento mester wordo pidi internacionalmente. El a agrega cu tur esaki nan a haci conforme ley y a entrega tur papel, up to date manera mester ta.
Rosaura a subraya cu nan no ta bisando cu su pareha no ta bay sali for di Aruba, y pesey nan a cumpre e pasashi. “Pero nos ta pidiendo pa respeta un derecho cu ta riba ley. Ora bo ta wardando un contesta di LAR, cualkier persona deteni tin un luna di tempo pa regla tur cos, pa por sali”, el a menciona.
Rosaura a sigui splica cu e decision a wordo tuma dia 12 di Januari y si wak e fecha su partner tin te dia 12 di Februari pa bay, y e pasashi ta cumpra pa dia 9 di Februari. “Pues, nos no ta incumpliendo cu ningun ley” el a reitera.
El a agrega cu si ya GNC a gare y a lague sali cu un pago di 1.750 florin di un Hurista ta mustra claramente cu tin un proceso y cu tin algo legal ta tumando lugar. “Pues, basa riba e mesun leynan nos ta pidi pa laga pa dia 9 pa e por sali”, Rosaura Groeneveldt a remarca cu esaki ta unico cos cu e y su famia ta pidi.
