ORANJESTAD (AAN): E informe lamentable a drenta den fin di siman, cu e turista Maurice Jerome Lynch di 85 aña di edad,
biba na Cedar Rapids na estado di Iowa na Merca, a fayece durante su soño.
El a bay lagando su tres yiunan di criansa, su ruman homber, y varios miembro mas di famia.
Conoci pa su amigonan como ‘Mick’, e tabata un pastor. El a dedica su carera na educacion, sirbiendo como educador, consehero pa studiantenan, y tabata cabezante di diferente scol, incluyendo DeSales High School, Loras College, LaSalle High School, y Wahlert High School.
Despues cu na 2003 oficialmente el a retira como pastoor, Mick a casa cu Lynda. Hunto nan a cuminsa un bida nobo viahando rond mundo, y ademas di Roma y Irlanda, nan tabata encanta pa pasa vakantie na Aruba.
Mick tabata stima saca potret di su vakantienan, documentando nan viahenan pa Aruba. E tabatin pasion pa colecciona moneda, patch di uniform, y souvenirs. Su amor pa toca piano ta grandi, y su dedicacion profundo pa educacion y fe.
Famia- y amigonan por despedi di dje y duna condolencia Diabierna awor na Cedar Memorial Park Funeral Home na Iowa, y tambe Diasabra mainta na St. Patrick’s Church, y misa mes lo ta pa 11’or di mainta. E lo wordo dera na Cedar Memorial Park Mausoleum.
