Tur cos ta cla pa awe e prome Island Festival Aruba di aña

ORANJESTAD (AAN): Manera cu DIARIO a anuncia recien caba, e evento di ‘Island Festival Aruba’ ta regresa awe Diaranson, esta 26 di Juni 2024 den cayanan di San Nicolas.

   E actividad aki ta habri tanto pa nos hendenan local como pa turistanan.  Bin experiencia un celebracion cultural atrabes di cuminda local y multicultural, musica captivante, y arte local. Trece bo Zjeito y e amor pa nos hendenan durante e celebracion bunita aki.

   E festival aki ta un evento unda tur persona lo explora nos herencia, goza di nos tradicionnan y descubri pakico Aruba ta conoci como ‘One Happy Island’. 

   E festival aki lo tuma lugar tur ultimo diaranson di luna den e districto di San Nicolas. San Nicolas ta considera como e capital di cultura, y lo tin e honor di ta anfitrion di e evento principal aki cu ta celebra Aruba su herencia y alaves ta famoso pa su murayanan yena cu artenan colorido.

   Island Fest Aruba lo tin un lineup diversifica di musica bibo, mustrando e herencia musical di e isla. For di e ritmonan contagioso di musica tradicional Arubano, manera tumba y calypso. E festival ta promete di tin un variedad di bendedoranan di cuminda, artesania y mucho mas.

   Pa awe Diaranson, lo cuminza pa 6:45 pm cu musica Tipico.  Pa 7:30 pm lo bay tin un Show Historico.

   Pa 8:00 pm, na Joyride Band lo subi escenario y presenta nan seleccion di musica.

   Pa 9:00 pm, lo toca turno pa Tsunami pa cuminsa yuda publico los pianan aun mas.

   E evento mes lo finalisa pa 10:00 pm.

   Un palabra di pabien na henter e team di Island Fest Aruba pa continua cu e evento aki cu semper tabata exitoso y ta invita ful Aruba pa bin disfruta di nos musica, arte y cumindanan local awenochi.  Entrada lo ta gratis.