ORANJESTAD (AAN): E conocido operador di tour di Europa, esta TUI, a tuma decision den fin di siman cu debi na e constante incertidumbre
relaciona cu codigo oranje y codigo cora, ta bay stop cu algun viahe. Aunke Spaña a habri su frontera pa hendenan di Gran Bretaña dos siman pasa, Gobierno ta urgi nan pa nan no viaha pa unda tin codigo oranje.
Pesey TUI a anuncia cu nan ta cancela tur viahe despues cu varios lugar awor ta cay bao di codigo oranje y codigo cora. Nan a cancela pa awor tur viahe y pakete di vakantie, pa awor te cu 13 di Juni 2021.
Algun di e destinacionnan afecta, pa colmo ta lugarnan favorito cu Britaniconan tabatin speranza di bay pasa vakantie e luna venidero. Esakinan tabata inclui Grecia (Crete, Halkidiki, Kefalonia, Preveza, Samos, Santorini, Skiathos, Thassos, Zante), Italia y Spaña (como tambe e islanan Formentera, Mallorca, Ibiza, Menorca, y La Palma).
TUI a cancela tur vuelo tambe pa Aruba, Croacia, Chipre, Jamaica, y Tanzania.
E compania a bisa cu e no kier hiba viaheronan riba vakantie unda nan ta wordo rekeri pa bay den cuarentena (sea eynan of ora di regresa), y cu no por wordo haci mas cortico hasta si nan bin cu prueba negativo di Covid-19 test, of prueba cu nan ta completamente vacuna.
Den caso di Spaña, e pais a habri su frontera na Britaniconan dos siman pasa, pero keto bay e ta riba codigo oranje, nificando cu e pasaheronan tin di bay den cuarentena pa 10 dia ora di yega bek nan pais.
Algun pais kizas lo bay ta porfin riba codigo berde, pero esaki lo socede aki algun dia.
