ORANJESTAD (AAN): Un ciudadano a duna su reaccion, despues cu siman pasa el a lesa den DIARIO, e sugerencia pa tur piscado na Aruba cuminza usa un ‘Personal Locator Beacon’ ora di subi lama pa bay pisca.
“Ami no ta un piscado, pero mi tin un boto cu den weekend mi ta bay lama pa pasa momentonan di placer,” el a indica na DIARIO. El a reacciona pa mustra cu enberdad tin hopi di e aparatonan chikito aki cu bo ta djis keda cune na bo curpa mara na bo faha of den un estuche, y si diripiente motor di boto daña, bo cuminza drif bay leu, of hasta cay den lama... e aparatonan aki por ta importante pa bo rescate.
El a nota cu DIARIO a pone potret di un Personal Locator Beacon fabrica pa Garmin. E ta haya esey hopi bon marca, pero e ta considera nan toch un mucho caro.
Pa un prijs hopi mas abao, den careda di $200, el a haya uno di e marca SPOT cumpra. Esaki tambe ta chikito, ta color oranje, ta waterproof, y den un emergencia bo ta primi boton, y e ta manda un señal di SOS di Emergencia. E ta transmiti pa un satelite, bo mensahe di SOS y bo locacion di GPS. Esaki ta bay na e organizacion Geos, cu ta facilita servicio di Buskeda y Rescate den bo region. Ademas di e mensahe di SOS, cu e aparato di dje, bo por hasta manda mensahe pa bo famianan.
E kiermeen cu SPOT Gen 3 cu e ta usa, tin biaha bateria ta wante hasta pa 11 dia. El a agrega, cu pa bo usa e sistema di SPOT aki, bo tin di bay di acuerdo cu un abono pa servicio. Esaki ta core alrededor di $200 pa aña. E ta haya esaki algo fenomenal, y e $200 ey ta manera un ‘aseguro’ cu si bo ta perdi riba lama, sin motor, ta drif bay leu, bo por pidi yudanza cu e aparato aki. Geos lo notifica RCC di Curacao cu lo notifica demas instancia. El a splica cu ta online el a cumpra e aparato pa alrededor di $200, y tambe via online e ta pagando abono di $200 pa aña.
