ORANJESTAD (AAN): Rond di mundo, e companianan di barco crusero a cuminza haci preparacion pa aki algun siman of luna por cuminza nabega atrobe.
Na algun parti di mundo, ya caba tin viahenan crusero cu ta andando sin problema. Recien tambe a cuminza cu viahe na Israel, unda ya caba gran parti di e ciudadanonan a vacuna. Royal Caribbean International ta haciendo e viahenan aki cu ta sali for di Israel, y nan ta percurando pa tur miembro di tripulacion abordo di nan barco tambe a haya tur dos dosis di vacuna.
Mientras tanto, na Aruba tin cinco barco di turista mara na Waf, sperando e momento cu nan ta haya luz berde di nan compania madre pa cuminza viaha.
Tres di nan ta di Norwegian Cruise Line, esta e barco Norwegian Joy, Norwegian Gem, y tambe Norwegian Sky.
Siman pasa, Norwegian Cruise Line a anuncia cu nan lo resumi operacion for di diferente waf na Merca y internacional.
Norwegian Joy cu ta mara aworaki na Aruba, lo cuminza cu nan viahenan di vakantie saliendo for di Miami entrante 19 di October 2021, cu viahenan di 5-dia y tambe 11-dia.
Nan tabatin plan pa pronto usa Norwegian Sun cu tambe ta mara aworaki na Aruba, pero awor a cancela esey. E barco aki lo cuminza cu nan viahenan di vakantie saliendo te 28 di Januari 2022, cu viahenan for di Hong Kong.
TRIPULANTENAN YEGANDO:
Mientras tanto den fin di siman, por a nota cu Norwegian Cruise Lines a cuminza prepara e barco di ‘Norwegian Joy’ pa un eventual start up bek pa asina na October cuminza cu viahenan for di Miami.
Via di vuelo cu KLM for di Amsterdam, ta masha hopi miembro di tripulacion di cual mayoria ta Filipino, a yega Aruba pa asina nan subi barco. Pues nan tin 4 luna di tempo pa pone e barco bek den condicion optimal pa haci e viahe.
Norwegian Cruise Line a indica cu 13 di nan barconan lo bay drenta den servicio dentro di poco. Esey nifica cu nan lo tin 19.000 empleado bek trahando riba e barconan.
Pero e compania lo tin di bay busca 17.500 empleado di awor te cu Februari 2022 pa asina e barconan ta bek cla pa nabega. Mientras tanto riba Diadomingo mes a mira hopi Filipino cu a yega pa subi barco aki na waf, y cuminza haci trabao.
Den Waf di Aruba tambe tin e barco “Insignia” di Oceania Cruises. Un boletin cu nan a emiti na final di April 2021, no a duna ningun indicacion cu nan tin plan pa start viahe cu e barco aki pa resto di 2021. Aunke algun tempo pasa a splica cu nan lo kier usa Insignia pa viahenan di 6 anochi saliendo di Spaña pa nabega den mediteraneo, awor ya no ta lesa nada mas di esey.
