Tres ex-alumno di Colegio San Antonio tabata di bishita

ORANJESTAD (AAN): E siman aki, directiva di Colegio San Antonio MAVO na Santa Cruz a ricibi un bishita hopi special.

   Ta trata aki di bishita di 3 ex-alumno di Colegio San Antonio, kendenan a gradua 50 aña pasa. Nan a keda den contacto cu otro y a haci peticion pa bishita nan scol bieu.

   Nan a wordo ricibi door di Director Lee di scol.  A compronde cu tabata masha agradabel pa scuchanan conta storia di antes y scuchanan papia di e impacto cu Zr. Cecilia y otro docente, entre nan Betico Croes, tabatin riba nan formacion.

   E ex-alumnonan cu tabata di bishita ta Leo Werleman, Jacintho Werleman y Hubert Croes.  Nan a saca potret banda di e memorial poni pa Zr. Cecilia.