Traspaso di mando na Mariniers Kazerne Savaneta

ORANJESTAD (AAN):  Riba Diaranson, 17 di augustus, Teniente Colonel di Marina Art van Beekhuizen a pasa

e Comando di Kazerne di Marina Savaneta pa colega den rango, Teniente Colornel di Marina, Tim van Wijk.

                Van Beekhuizen den su discurso di despedida a tira un bista atras  riba e subida y bahadanan durante su comando. 

                “For di e Kazerne aki nos tabatin hopi implementacion exitoso di e Scuadron di Marina Caribe y e Mariniernan arubiano  hunto cu Guardacosta Region Caribe Hulandes y tambe Cuerpo Policial Aruba, cu e fin di salvaguardia e integridad di e fronteranan y e mantencion di orden publico y siguridad.

                Mi ta pues orguyoso di e colaboracion entre e organizacion di Kazerne, Voedselbank y Crus Cora. Di observacionnan encubri di nos infanteria di Marina, te na tripulacion di e cuartel cu a bay cushina pa esnan pober den comunidad, durante e pandemia di Covid-19. Nos a haci esaki cu esfuerso maximo, entusiasmo y conviccion”.

                Den esaki van Beekhuizen a menciona un otro punto special cu a destaca: “Mi ta sinti masha bon mes  cu nos por a yama damanan bon bini den e Trayecto di Formacion Social y cu esey a dal un stap principal den Caribe. Mi ta spera cu na 2023, nos por yama bon bini na e siguiente grupo di damas.”        Finalmente el a gradici tur hende pa e bon cooperacion, envolvimento y sosten durante e ultimo añanan.

                E Comandante nobo di Kazerne, Van Wijk, a gradici Van Beekhuizen pa e añanan cu a pasa, pa e periodo intensivo di familiarisacion, y e yudansa personal pa yud’e riba e stul. Van Wijk a menciona tres punta di lansa importante y e posibilidadnan  pa yudansa Militar durante su spich; “Espiritu di ekipo, modestia y diversion.

                E cooperacion cu nos ta brinda Aruba ta desinteresa, nos ta cuida otro, nos ta dialoga cu otro, nos tin confianza den otro y den e ekipo, nos ta realisa con bon nos tin e y ta comparti esaki cu e comunidad di Aruba y cu nos mes famianan. Mi ta para pa esaki. Nos ta para pa esaki.”

                E traspaso di Comando entre otro a keda asisti pa dignatarionan di Aruba, entre otro Gobernador Alfonso Boekhoudt.