Trahadonan di IBiSA rumbo pa Spaña pa atende curso di coach di futbol  

ORANJESTAD (AAN):  Riba dia 22 di Augustus 2024 dos trahado di Instituto Biba Saludabel Aruba (IBiSA),

Sr. Francis Tromp y Sra. Mildred Wever a sali rumbo pa Valencia, Spaña pa atende un curso di coach di futbol.

            E curso lo dura te dia 6 di september 2024 y durante e curso e participantenan lo ricibi entrenamento riba varios area relevante di coach, e.o. riba metodologia di deporte y planificacion administrativo. E curso ta ser organisa pa Rush Spain SPF, un institucion specialisa den formacion di coach di futbol.

            E meta principal di e participacion ta pa dor di e conocemento y experiencia adkiri, fortifica e capacidad y eleva e calidad di coach, como tambe e parti administrativo, pa asina duna un aporte na IBISA mediante su deporte escolar.

            IBiSA ta expresa su gratitud na Erasmus+ y Fundacion Tur Cos Ta Posibel di Aruba pa nan apoyo pa asina e dos coleganan por a realisa e biahe aki.

            Por ultimo ta desea Sr. Tromp y Sra. Wever hopi exito den nan estadio na Valencia, Spaña y cu e conocemento adkiri durante e curso duna impulso na e desaroyo di futbol escolar y deporte en general na Aruba.