Minister Maduro di Finansa ta informa:
*E ultimo Cuenta Anual cu a haya un declaracion di accountant ta di aña 1998
ORANJESTAD (AAN): Diabierna mainta Conseho di Minister a haya un update di e trabounan cu ta wordo haci na Centraal Accountantsdienst CAD y na Departamento di Finansa pa por mehora e administracion financiero di Gobierno cu ta forma e base pa por yega na Cuentanan Anual cu certificacion di accountant.
E cambionan aki ta necesario pa asina Aruba por cera e ciclo presupuestario cu un Cuenta Anual di Pais Aruba di cual un accountant por duna un certificacion cu e cifranan presenta ta cuadra cu locual realmente a pasa den gobernacion den e aña presupuestario.
Te cu awe, ningun Cuenta Anual di Pais Aruba a yega di haya un certificacion di accountant. E ultimo Cuenta Anual di Pais Aruba cu a wordo controla pa un accountant tabata na aña 1998, y e tempo ey a logra haya un declaracion di accountant, pues no un certificacion cu ta bisa cu e cifranan ta cuadra cu realidad. Pa e motibo aki dentro di e reformanan necesario pa haci Aruba mas fuerte y resiliente, tin trabounan ta wordo haci pa por yega na un declaracion special di accountant pa e Cuenta Anual di aña 2026 di Pais Aruba.
Durante e presentacion Conseho di Minister a wordo informa riba e stapnan cu ta necesario pa wordo tuma den e tempo nos dilanti pa asina por yega na un certificacion di e Cuenta Anual di Pais Aruba door di un accountant. Pa yega eynan mester introduci awor aki algun cambio den e organisacion y e proceso administrativo di Gobierno. Lo organisa den e administracion financiero di Aruba un 'three lines of defence' na unda dentro di cada departamento procesonan financiero ta wordo alinea pa asina esaki por facilita e informacion financiero cu despues mester wordo compila pa Departamento di Finansa den un Cuenta Anual di Pais Aruba cu despues ta wordo controla pa CAD y Algemene Rekenkamer Aruba ARA, y finalmente ta wordo certifica pa un accountant externo.
Pa e cambionan por ta exitoso ta importante pa cada actor ta consciente di nan responsabilidad pa e procesonan ta 'in place' y pa e informacion financiero ta completo desde e comienso. A enfatisa cu e responsabilidad pa e maneho financiero no ta solamente di e Minister di Finansa, pero cada Minister individual ta keda responsabel pa e maneho financiero hiba den e departamentonan cu ta resorta bou nan responsabilidad. Mescos, e responsabilidad pa e administracion financiero no ta concentra solamente na Departamento di Finansa, pero cada departamento di Gobierno ta responsabel pa e calidad di informacion financiero cu nan ta procesa.
Den e tempo nos dilanti Conseho di Minister, departamentonan di Gobierno y Pueblo en general lo sigui wordo informa di e avansenan den e trabounan pa mehora e maneho financiero di Pais Aruba, specialmente di e trabounan pa por yega na un certificacion di e Cuenta Anual di Pais Aruba pa aña 2026.
