Monumentenbureau contento con bunita el a keda
ORANJESTAD (AAN): Monumentenbureau ta anuncia cu trabaonan di mantencion pa cu e edificio Monumental di Departamento Recurso Humano (DRH) a yega na su final. Conoci como ex-De Arend Petroleum Maatschappij y ex-oficina di turismo.
Den presencia di Director di S&L Contractor N.V. sr. Larry Nedd y Director di Monumentenbureau, sra. Yvonne Webb-Kock a firma e procesverbaal pa cu e finalisacion di e proyecto. Personal di DRH a keda sumamente contento y agradecido con bunita e interior y exterior di e edificio a keda. Sigur cumpliendo cu e deseonan cu detayenan moderno y un ambiente agradabel.
Un proyecto cu a topa algun contratiempo pero cu a termina cu un bunita resultado.
Durante di trabaonan a descubri un pida vloer historico cu a wordo treci bek den su estado original. Monumentenbureau ta gradici Gobierno di Aruba, Minister di Asuntonan general sra. Mr Evelyn Wever-Croes, Minister di Finansas, Economia y Cultura, sra. Xiomara Maduro, y Departamento Recurso Humano pa e confiansa y e fondonan aloca pa realisa e proyecto di mantencion.
Monumentenbureau tambe ta gradici S&L Contractor N.V. subcontractor Aruba Climate Control N.V., personal di Monumentenbureau, DRH y tur esnan cu a haci e proyecto aki posibel, specialmente na e personal di DRH pa nan pasenshi. Monumentenbureau ta sigui aporta na mantencion di nos Monumentonan.
{gallery}Monumental di Departamento Recurso Humano (DRH) a keda cla{/gallery}
