ORANJESTAD (AAN) -- Tocante e hecho cu tin cierto companianan cu nan trahadornan ta hayando 75% of 85% di nan salario, ya pa casi dos aña caba, mientras cu otro empresanan similar si a bay bek na paga salario normal, Minister Presidente a haya un pregunta, durante e conferencia di prensa di Dialuna.
“Kico e trahadornan cu ta sigui wordo afecta por haci? Minister Presidente a haya mesun pregunta of critica aki for di varios persona den comunidad, y e dignatario a pidi Minister Glenbert Croes, pa atravez di Departamento di Labor pa atende cu e tema aki.
“CAft ta bisa cu pa fin di e aña aki Aruba su hotelnan ta bay ta yen, tur hende ta bay tin trabao, ta bay tin hopi mas turista cu tabata tin na 2019, pues, consecuentemente, no ta bay tin mucho espacio mas pa ta pagando hendenan menos de la cuenta. Ta asina tambe cu si loonsubsidie cay afo, e ora ey no tin base mas pa doño di trabao corta den salario di trahador.
E riesgo ta si, cu si e doño di trabao no por cargue, e ta cuminza kita trahado. Den esaki un balansa tin cu busca, bo no por bay forza un doño di trabao cu no tin manera pa bay paga 100% na tur trahado pasobra e ta kibra y tur trahado ta perde trabao. Di otro banda, si e compania bay bon no tin motibo pa no paga e trahado full.
Ta manera riba lomba di e trahado bo ta spaar pa otro cosnan, anto eynan Minister di Labor tin un trabao hopi grandi pa busca e balansa, y e ta esun encarga cu esaki”, Minister Presidente a acentua.
