Trabao di mantenimento a start ya caba na NV Elmar

Tene cuidao cu calor e dianan aki

* Compania ABB Rotterdam ta yudando cu mantenimento 

ORANJESTAD (AAN): E compania NV Elmar tin metanan su dilanti caminda e kier pa interupcionnan di coriente stop di perhudica comunidad.

   E momentonan aki NV Elmar ta vigilando mas di cerca e ‘load’ di coriente cu nan ta ricibiendo for di WEB Aruba NV.  Esey ta loke Jonathan van der Linden, kende ta Hefe di Departamento di Operations na e compania NV Elmar a indica.  El a indica cu e sistema electrico ta hopi vulnerabel cu temporada di calor.  Esaki ta algo cu normalmente ta duna nan dolor di cabes den lunanan di Augustus y September.

   Pero e biaha aki, ya for di luna di Mei nan a cuminsa sinti e dianan di extremo calor aki, y e ta algo cu nan lo sigui vigila.

   Segun van der Linden, nan ta cumpliendo tambe cu e proceso di acelera mantenimento riba e grid di coriente rond di e isla.  Nan tin un plan di mantenimento traha, no djis pa e asina yama “Casitanan di Trafo” chikito cu tin rond di e isla, pero tambe mantenimento pa wordo haci den instalacionnan mas grandi.  Aki e ta referi na instalacionnan di 60 mil Volt, tambe Transformernan di 60kVolt, y tambe Switch Gear di 60 mil y tambe 12 mil Volt.

   Van der Linden a splica cu NV Elmar ta haciendo e mantenimentonan aki hunto cu expertonan cu a bin di exterior, den e caso aki e compania ABB Rotterdam.  Semper e compania local ta pone ekiponan grandi haya mantenimento sea cada 3 aña, y otronan ta cada 5 aña.

   E Hefe di Departamento a indica cu e mantenimentonan planea nan lo kier keda cla cune, prome cu e temporada calor di Augustus/September venidero yega.  Van der Linden ta mira cu esaki lo bay ta completamente cla pa final di luna di Juni 2024.

   Elmar no kier pa e mantenimentonan aki socede den temporada calor.  Pasobra ora e trabao ta andando, nan ta traspasa tur load for di un Casita di Trafo, pa un otro Casita.  E ta wordo haci debi cu kabelnan tin e capacidad pa wanta nan, pero semper por presenta un situacion cu un di e kabelnan no por sostene e extra capacidad, y aki ta bin cu storing inespera.

   Calor afecta kabelnan: E calor extra ta afecta kabelnan di coriente, manera Van der Linden a indica.  Na Aruba, kabelnan bao tera ta wordo dera na un profundidad di sea 30 cm of di 50 cm bao di tera.  Aki e tera ta hopi cayente, y durante lunanan calor, ta bira aun mas cayente.  E kabelnan ta bira cayente no djis door di e tera, sino tambe door di e extra ‘load’ di coriente cu nan ta bay carga.

   Consecuencia di esey ta cu algun kabel por sufri di un corto-circuito.  Special pa esey, segun Jonathan van der Linden, awor e compania NV Elmar ta trata di identifica e situacion y peligro aki di antemano.

   Durante temporada di calor, semper hendenan tin tendencia di bay usa mas coriente, pasobra ta cende airco mas largo, ta baha e temperatura y esey ta pone compressor sigui traha mas, y ta consumi mas coriente.  Mas airco cendi rond di Aruba, nifica cu consumo rond di e isla tambe ta subi.  Aunke na opinion di van der Linden, NV Elmar tin kabelnan cu suficiente capacidad pa suministra pueblo.  Pero pueblo tin di keda conciente, cu mas uso nifica cu bo cobransa lo bay ta mas halto tambe fin di luna.