Toque de Queda ta wordo elimina entrante awe 25 di Mei

ORANJESTAD (AAN):   Gobierno di Aruba hunto cu Crisis Team Covid-19 a tene un conferencia di prensa extraordinario dialuna atardi.

Prome Minister Evelyn Wever-Croes a hiba palabra y a haci anuncionan importante den cuadro di e cifranan di Covid-19 te cu diadomingo ultimo.

El a referi na tres aspecto importante:

- E casonan nobo ta den averahe 9 pa dia

- Na Hospital, te cu diadomingo tabata tin 14 persona interna y esaki ta cifranan cu por maneha.

- E grado di vacunacion cual ta na 62%

E mandatario a splica cu den e contexto aki ta mira luz na final di e tunel pa flexibilisa mas. Ta pa e motibo ey cu a dicidi lo siguiente:

1. Toque de Queda ta wordo elimina entrante diamars 25 di Mei. No tin espacio ni hustificacion mas pa tene e toque de queda, cual ta vigente desde December 2020.
2. Gebiedsverbod riba beach y riba rif ta wordo elimina, pero e ta keda na vigor pa riba terenonan publico entrante 7:30 pm. Prohibicion riba caminda publico tambe ta keda existi.
3. Orario di ciere ta keda maximo 11 pm pa tur establecimento cu excepcion di Casino cual tin e orario di ciere te cu 1 am. E orario di Lotto ta bay bek te na 8:30 pm.

Ta bay wanta e orario di ciere un tempo ainda pa asina evalua con e situacion ta bay.

Evelyn Wever-Croes a laga sa cu comercio cu tabata na 50% ta bay bek na capacidad normal. El a menciona algun ehempel, manera gym. botonan di charter y supermarket.

Actividadnan deportivo ta keda 60% ainda.

 Finalmente, el a enfatisa cu tapaboca ta bay keda un tempo ainda na vigor. No tin manera ainda pa bay controla esnan cu si ta vacuna of no.

A agrega cu ainda falta 38%  di e poblacion pa bay vacuna y ta mira cu leu leu ta haya e variantenan cu ta bin cambia e situacion.