Top Chef Charbel Hayek ta na Aruba pa exclusivo evento culinario na Aruba Marriot Resort

ORANJESTAD (AAN):   Durante un rueda di prensa na Aruba Marriott Resort a anuncia un tremendo evento cu lo tuma lugar e weekend aki.

Ta trata di dos anochi di un evento culinario na Mercát Restaurant (antes La Vista).

            Pa e ocasion aki, tin como invitado special Chef Charbel Hayek di Lebanon, kende ta un chef renombra, ganador di Season 5 di Top Chef, Middle East 2022 y doño Executive Chef di Ladyhawk na West Hollywood, cual ta un restaurant mediteraneo conoci pa su 'modern Greek dishes' unda e ta mescla sabornan tradicional y tecnicanan moderno.

             Chef Hayek tambe autor di e buki 'Lemon & Garlic' ta na Aruba pa asina deleita e amantenan cu e cushina mediteraneo cu specialidadnan culinario durante e dinner exclusivo di 6 & 4-course y 'wine pairing' na Mercát. Esaki lo tuma lugar diabierna y diasabra awor pa 6:30 p. m.

            Complex GM, Raoul Lemmerling hunto cu Noemi  Tromp, Marketing Manager di Aruba Marriot  Resort & Stellaris Casino a yama Chef Charbel Hayek bon bini na Aruba.

            Chef Hayek ta hopi contento di ta na Aruba pa cushina algun di su platonan cual el a elabora durante Top Chef. Algun di nan cu ta 'signature', otronan di su mesun buki, pero tur ta sali for di su curason, a bisa.

            Mercát Restaurant, antes La Vista, a wordo habri algun luna pasa despues di un periodo di renobacion. Awor e tin un concepto y un menu completamente nobo basa den cushina mediteraneo, asina GM Lemmerling a duna di conoce.

            Ta importante pa indica cu pa e evento aki, Chef Charbel Hayek lo traha den conhunto cu studiantenan di Colegio EPI cu lo wordo inspira pa empodera nan talento culinario.

            No perde e tremendo evento aki e weekend den porta.