Meverly Romano, Relacionista Publico di DIMP:
ORANJESTAD (AAN)—Den entrevista cu DIARIO, señora Meverly Romano, Relacionista Publico di Departamento di Impuesto di Aruba (DIMP), a duna informacion tocante e cumplimento y incumplimento di Belasting riba number di auto, den nos comunidad, te aworaki.
Meverly Romano a señala cu semper tin un grupo cu ta cumpli bon y otro cu no ta cumpli manera mester ta, y na e momentonan aki, berdaderamente DIMP a tuma nota cu Cuerpo di Polis a cuminza controla, entre otro, e parti di impuesto.
Señora Romano a bisa cu esaki ta hopi necesario pasobra na momento cu un automobilista dicidi cu e ta subi careteranan publico, e lo mester percura pa tur su documentonan ta na ordo: e keuring, e belasting, e seguro.
Pa loke ta trata e cifranan, Romano a comenta cu na e momentonan aki tin 89.629 vehiculo di motor registra; e categoria mas grandi ta esun di vehiculo personal, pues categoria di plachi A cu ta 77.615. “Di e grupo aki nos tin un cumplimento di 81% cu ta 72.752 vehiculo di motor cu tin pago registra, y tin 19% di cual na e momentonan aki 17% no a cumpli y 2% di automobilistanan cu a entrega nan plachi number, indicando cu nan no ta usando nan auto. Esey ta hopi bon, pasobra na momento cu bo no ta usando bo auto, pa ki motibo cu por ta, semper ta recomendable pa entrega bo plachinan y bo tin chens di no paga Impuesto concerni”, Meverly Romano a duna di conoce.
Tocante e 17% cu no a cumpli, esaki ta representa un total di 14.806 plachi di number cu no tin cumplimento di pago completo of parcial.
“Den cifra e ta 5.606 plachi cu nos tin na e momentonan aki, caminda e automobilista a paga solamente e prome mitad di aña 2023 y falta ainda paga e di dos mitad di 2023. Na e momento aki, tur automobilista lo mester tin aña 2023 paga completamente. Y nos tin un cantidad di 9.200 number cu no tin pago at all di aña 2023 riba nan y esaki ta representa 10%”, Romano a indica.
“Kiermen, nos tin e ora ey un total di 17% cu no tin cumplimento di pago sea completamente of parcialmente. Y nos ta keda weita cu e categoria mas grandi di incumplimento ta plachi A cu un total di 7.798 di personanan cu no a paga nada mes di 2023. Y un total di 5.123 cu a paga solamente e prome mitad di aña 2023 y nan falta di paga ainda e di dos mitad”, Meverly Romano, PR di DIMP a agrega.
Den total den e categoria A tin no cumplimento di 12.921 auto, cu ainda ta halto, pasobra aworaki ta casi mitad di December mientras cu na e momento aki e impuesto di full 2023 mester ta completamente paga.
Romano a bisa cu e hecho cu tin 12.921 plachi di auto cu ta parcialmente paga of completamente no paga, ta preocupa DIMP, aunke nan ta contento cu di otro banda tin 81% di cumplimento. “Pero e ta keda preocupante na momento cu bo tin 14.806 number cu no ta paga esey ta nifica cu e automobilistanan aki ta bay drenta Januari cu un debe di 2023 y kizas hasta nan tin debe di 2022 of añanan mas bieu y esey ta fastioso pasobra e personanan aki no ta bay wordo permiti pa paga e impuesto di 2024 tanten cu nan no cumpli cu e añanan cu tin pendiente di pago”, Merverly Romano, PR di DIMP a enfatiza.
