Rubiella Toppenberg di FADA:
ORANJESTAD (AAN): Fundacion Anti Droga Aruba ta alerta riba un desaroyo di uzo di droga cu ta tumando luga hopi na Aruba den e ultimo temponan aki. Segun Rubiella Toppenberg di FADA, den un entrevista cu DIARIO, esaki ta trece gran preocupacion na FADA cu ta e fundacion cu ta traha pa preveni abuso di droga na Aruba.
Ta trata aki di un grupo di hoben mucha homber cu ta busca mucha muhenan hoben den clubnan y barnan nocturno pa purba droga nan. Un di e droganan cu nan ta uza ta GHB, cu ta un droga cu mas tanto nan ta tira den e bebida di e mucha muhenan. Despues di un rato, e persona ta perde nocion di tempo y ta bay for di tino. E droga aki ta wordo considera tambe como un ‘date rape drug’.
Señora Toppenberg a duna di conoce cu tambe tin otro droganan cu ta circulando den clubnan nocturno cu e grupo di mucha hombernan ta uza pa yega na na meta, entre otro Scopolamine y Tusi (un mixto inconsistente y peligroso di varios substancia).
Segun Toppenberg, apesar cu FADA ya pa varios luna ta lesando e noticianan aki den diferente media social, a yega tempo pa duna mas informacion di e peligronan cu e actonan aki ta causando na Aruba, pa conscientisa tur persona especialmente nos hobennan cu ta sali pa ta consciente di e tendencia aki. Tur persona cu ta sali y bebe, ta core riesgo cu un of otro di e droganan aki por wordo tira den nan bebida.
FADA ta recomenda cu na momento cu un persona pidi un bebida, e mester keda cu bista riba e bartender cu ta traha su bebida te ora e caba di trah’e y entreg’e. Tambe mester keda alerta riba tur persona cu ta rond of cerca, hasta di esnan cu ta den bo mesun
“Tur hende mester ta hopi cauteloso pasobra tin hopi droga ta circulando den e tempo aki. E por ta den forma di pilder, puiro, likido, y patch. Ora bo scoge pa sali, sea consciente di bo limite. No tuma nada di hende straño y keda semper cu bista riba e persona cu ta traha bo bebida”, señora Toppenberg a enfatisa.
