Abogado Desiree Croes:
ORANJESTAD (AAN): Abogado Desiree Croes a duna di conoce durante un entrevista cu DIARIO cu a yega di haya hopi caso di personanan cu a wordo 'piki' door di Guarda Nos Costa y nan ta keda tempo largo cera.
Pero den e caso aki nan no a comete ningun crimen. Unico cos cu nan a haci ta cu nan no tin e papelnan necesario. "Nos sa cu Aruba ta un pais chikito y no por tuma tur hende. Pero na momento cu nos a cuminsa cera e frontera, na momento cu a introduci e visa, mi ta kere ya caba nos a cuminsa limita e cantidad di personanan cu ta bin", a bisa.
Awor ta e momento pa mira kico por haci cu esunnan cu tey caba y mira cua ta e mihor manera pa por integra nan na Aruba y wak kico por significa pa nan y kico por significa pa Aruba.
E abogado ta kere cu en bes di ta contra e grupo di personanan indocumenta of con por haci pa nan por bay mester wak kico por haci pa nan por funciona di e mihor manera riba e isla.
"Nos conoce nos tur hopi imigrante hopi exitoso na nos pais cu a saca cara di Aruba. Mi ta kere cu esey lo pasa mas y mas den futuro. Mundo ta cambia, cosnan a cambia. Aruba no ta e Aruba di antes mas. Pero no necesariamente mester ta algo negativo", a remarca.
Si como arubiano of como comunidad, pero tambe como gobierno mester cambia e vision riba migracion y haci esaki algo positivo na lugar di algo negativo pa e ora por ta mucho mas leu, Desiree Croes a indica.
"Tur hende cu ta haci bon na Aruba nos mester ta brasanan habri pa nan tambe por desaroya nan mes riba nos pais y asina ey hiba nos pais dilanti", a expresa.
Desiree Croes ta abogado y actualmente e ta yuda "La Casa del Venezolano" cu asesoria huridico na e imigrante.
