Estudio mester wordo haci di aporte di mama den comunidad moderno --- *E prome relato di un mama di un criatura sexualmente abusa --- *E conhunto di tarea di mama den sociedad na momento di crisis
ORANJESTAD(AAN)-- E calidad di “mama” na Aruba awe ta keda di importancia mayor pa posibilidad di adelanto pa Aruba.
Ora papia di situacion financiero di e pais y bolbe na e momento cu Lago a bay, ta topa cu mamanan cu mester a consola nan esposonan cu a keda sin trabou y tabata yora ora e porta di Lago a cera.
E potencial, demasiado bez scondi di mamanan, a bini dilanti den e creatividad pa habri caminda pa futuro.
E peso di ciere di Lago tabata grandi ya cu ta conoci cu e haltura di salarionan y beneficionan adicional di Lago, tabata halto. Mester a ahusta condicionnan di bida na casnan, cu a bira pober den un rato.
Periodismo pa DIARIO semper tabata basa riba lazonan directo cu miembronan di comunidad, cu tabata presenta nan problemanan riba tur tereno na DIARIO, e medio di comunicacion autentico di Aruba pa e Arubiano.
Portanan a habri pa mamanan tambe presenta nan pakete di problemanan cu hopi bez tabata scondi.
DIARIO asina a bira e medio cu un mama a usa pa pidi tur mama cuida nan yiu pa medio di e prome storia cu DIARIO a publica di abuso sexual di un criatura cu apenas por a cana.
DIARIO tabata e cas di mamanan di Aruba, cu a cera conoci tambe cu situacionnan doloroso social cu tabata scondi den barionan isola.
Mamanan cu yiunan no a duna nan balor, tabata biba den casnan miserabel. Pa atende un informacion di uno di e mamanan aki, DIARIO mester a atende cu un anciana cu aparencia sumamente pober, cu tabata biba den un casita cu no merece e nomber di cas.
Ora e mester a bolbe cas, el a prefera pa keda na cas di su yiu. Cu un orguyo enorme el a baha for di auto cu su pobresa bou su brasa pa bay e palacio cu tabata cas di su yiu, cu no tabata por a duna su mes un postura ora e mama pober a presenta su yiu rico na DIARIO.
Kico ta un mama, DIARIO a mira ora un señora cu a wordo condena na castigo di prison pa trafico di droga, den estado di desesperacion a acerca DIARIO pasobra e no tabata sa kico haci, ora su yiu a cay den droga.
E aporte di mamanan den relatonan esencial cu DIARIO por a presenta na epoca ochenta, ora cambionan grandi den mentalidad na mundo y Aruba a duna prueba di e forma cu mamanan ta carga e comunidad den silencio durante transformacion.
E cantidad di mamanan cu tabata traha pastechi entre otro pa yuda den e gastonan pa yiunan bay school pero tambe participa na exigencianan moderno pa bida social di hobennan.
Entrada di famia a subi cu trabou di mamanan pafor di cas y asina yiunan por a haya educacion mas avansa of sigui cursonan te na momento cu nan por a para riba nan propio pia.
E aporte di mamanan den comunidad a sostene economia di e pais sigur pasobra trabou pafor di cas di mamanan, a haci posibel pa mas cas wordo construi pa famianan mientras mas placa por a wordo hinca den economia.
Rapportnan cu mester mira luz ainda mester duna relatonan financiero y economico di e aporte di mamanan den e proceso di recuperacion di Aruba den crisis pa asina yega na un base di loke e comunidad mester pa sostene e funcion mas amplio di mama den comunidad.
Kico haci pa yuda e mama garantisa siguridad di su yiunan ora e ta traha? Den esaki mester mustra riba e relato di e mama cu a conoce e horor di confronta violacion di su yiu ora e tabata traha pafor di cas?
Kico ta pasa cu e mama ora yiunan ta den negoshi di droga y kico ta pasa cu e yiunan ora e mama tin negoshi droga?
Kico ta destino di e mama ora desaroyo di su yiunan a hiba nan na un nivel mas halto di bida, pero nan tin berguensa di e origen humilde di nan mama, cu como anciana ta keda bandona?
Dia di Mama 2022 ta wordo celebra den crisis riba crisis. E no ta un reto nobo pa Aruba, cu a nace como pais na momento cu crisis di petroleo a cera Lago; menasa di droga tabata crece y mamanan mester a kibra tur barera pa por a proteha nan famia como nucleo di Aruba.
