Marlon Croes, director DOW:
*Tin cinco criterio cu ta wordo evalua
ORANJESTAD (AAN) – Ing. Marlon Croes, director di DOW, den entrevista cu DIARIO a informa cu nan tin demasiado demanda pa asfalta camindanan, no solamente den bario pero tambe riba camindanan principal, pero tin un maneho di midimento cu esaki.
Tin cinco criterio den e red di careteranan, cu ta, 1: E funcion di e caretera den e red total. 2: E uso. 3: Estado di mantencion. 4: Cuanto cas tin na dje y 5: Con bieu e bario ta.
DOW ta evalua, haci opname di e careteranan, hinca nan den e top 20 cu ta bin na remarca pa wordo asfalta. Nan ta presenta nan na Minister y asina nan ta traha, den e ultimo añanan. Esun cu no a cay den dje no a haya e score suficiente pa yega na dje.
E cartanan cu DOW ta haya di ciudadanonan pa drechamento di caminda ta wordo trata, y si ta wak cu ta necesario nan ta re-evalua. Cada bario, peticion y caminda ta drenta den un sistema di analisis di urgencia y presupuesto. Croes a reitera cu awo cu RWZI sali di DOW ta keda riba presupuesto 5 miyon florin pa inverti den e camindanan cu mester drecha.
