Robby Rosel, PR di BCI:
*E practica aki ta peligroso y ademas prohibi!
ORANJESTAD (AAN) – Robby Rosel, Relacionista Publico di Bureau City Inspector (BCI), den entrevista cu DIARIO a declara cu e ta hopi contento cu e accionnan cu ta tumando lugar, relaciona cu e problema cu BCI a bin ta denunciando pa lunanan caba, cu awa di pos ta wordo tira den diferente area di Aruba, incluyendo algun cunuco sembra cu berdura.
Rosel a indica cu no solamente esun cu a wordo capta caba pero lo bay tin mas. “Ta pesey nos ta bay haci un suplica na tur e doñonan di truck y autonan pa por fabor no tira awa di sushi di pos den dam, ni den mondi, ni den locual ta tumando lugar actualmente, cu nos tin bista riba dje. Hopi di e septic tanknan ta muhando tereno di cas cu e awa aki cu ta peligroso tambe”, Robby Rosel a exclama.
El a agrega cu BCI ta bezig cu ne, y tambe cu esnan cu ta tira e awa aki riba berduranan of den e yerba unda por mira cu e awa di pos ta sali core bay y caminda cu esaki no ta permiti tampoco.
“Nos por bisa cu e doñonan di tereno no a keda mucho contento cu City Inspector a drenta conhuntamente cu polis y tambe cu nos director di City Inspector, cu tin autorizacion pa subi riba cualkier tereno y eynan nan mester a calma pa nos por a haci nos parti di nos trabao”, Rosel a splica.
El a sigui bisa cu tin cierto hendenan (pa bisa e cos manera e ta), cu ta doñonan di cunuco, cu nan mes ta traha e pasada di awa di pos pa bay cay riba diferente berdura y fruta cu nan tin, y tur e awanan aki ta core pa muha tur e matanan y tambe yerba pa bestianan come.
Esaki siendo cu e cunukeronan por haya awa di dam por nada, si nan tin un mashin pa saca e awa pa nan muha nan berdura, fruta y e yerba pa nan cria di bestia.
“Si nan no por nan ta paga un suma chikito na Santa Rosa, pa asina nan por deliver awa pa nan”, Rosel a señala.
